امریکی فوجیوں میں اس سال خودکشی کے رجحان میں نمایاں اضافہ ہوا ہے لیکن ایک جنرل کا کہنا ہے کہ یہ بات واضح نہیں کہ فوجیوں کی بار بار عراق اور افغانستان میں تعیناتی ان میں خودکشی کے بڑھتے ہوئے رجحان کا بڑا سبب ہے یا اس کی کوئی اور وجہ ہے.

امریکی آرمی کے وائس چیف آف اسٹاف جنرل پیٹرشیا ریلی نے ایک نیوز کانفرنس کے دوران بتایا ہے کہ رواں سال کے آغاز سے اب تک امریکی فوجیوں کے خودکشی کے ایک سو چالیس کیس رپورٹ ہو چکے ہیں جبکہ گذشتہ سال بھی اتنی ہی تعداد میں امریکی فوجیوں نے خودکشی کی تھی.

جنرل شیاریلی کا کہنا ہے کہ اس سال کے اختتام تک خود کشی کرنے والے امریکی فوجیوں کی تعداد گذشتہ سال کے مقابلے میں بڑھ جائے گی. انہوں نے بتایا کہ امریکی فوج کے فعال ڈیوٹی نہ کرنے والے اہلکاروں کے سوموار تک خودکشی کے اکہتر کیس رپورٹ ہوئے ہیں اور یہ تعداد سال 2008ء کے مقابلے میں زیادہ ہے.

خود کشی کرنے والے امریکی فوجیوں کے بارے میں یہ اعداد وشمار ایک ایسے وقت میں جاری کئے گئے ہیں جب امریکی صدر براک اوباما افغانستان میں مزید فوج بھیجنے پر غور کر رہے ہیں جبکہ اس جنگ زدہ ملک میں پہلے ہی اڑسٹھ ہزار امریکی فوجی تعینات ہیں.