ایران کے ایک سنئیر کمانڈر نے کہا ہے کہ آئندہ ہفتے جوہری تنصیبات کے خلاف کسی حملے سے بچاؤ کے لئے بڑے پیمانے فضائی دفاعی مشقیں کی جا رہی ہیں جبکہ ایک سخت گیر سیاسی جماعت کے سربراہ نے اپوزیشن لیڈر میر حسین موسوی کے خلاف صدارتی انتخابات کے بارے میں ''بڑا جھوٹ'' بولنے اور اسے پھیلانے کے الزام میں مقدمہ چلانے کا مطالبہ کیا ہے۔

ایرانی مسلح افواج کے ائیر ڈیفنس ہیڈکوارٹرز کے سربراہ بریگیڈئیر جنرل احمد مغانی کا کہنا ہے کہ ایران بہ ذات خود اپنا ایک جدید میزائل دفاعی نظام بنانے کی صلاحیت رکھتا ہے۔ انہوں نے یہ دعویٰ روس کی جانب سے اسرائیل اور امریکا کے دباؤ پر ایران کو جدید میزائل دفاعی نظام کی فراہمی میں تاخیر کے تناظر میں کیا ہے۔

مغانی کا کہنا ہے کہ روس اسرائیل کے دباؤ کی وجہ سے ایس300 میزائل دفاعی نظام کی فراہمی میں تاخیر کر رہا ہے اور اس میں کوئی فنی مسائل حائل نہیں۔ ایران کے نیم خبر رساں ادارے فارس کے مطابق انہوں نے کہا کہ ''ہمیں توقع ہے کہ روس صہیونی لابی کے دباؤ کو نظر انداز کر دے گا''۔جنرل مغانی کا کہنا ہے کہ ''اس ہفتے فضائی دفاعی مشقیں ملک کی جوہری تنصیبات کے تحفظ کے نقطہ نظر سے کی جا رہی ہیں''۔

ایرانی میڈیا کے مطابق دشمن کے ممکنہ حملے سے بچاؤ کے لئے فوجی مشقیں اتوار سے شروع ہوں گی اور ان میں پاسداران انقلاب اور ایران کی باقاعدہ مسلح افواج حصہ لیں گی۔ واضح رہے کہ اسرائیل اور امریکا نے جوہری تنازعے پر ایران کے خلاف فوجی کارروائی کے امکان کو مسترد نہیں کیا جبکہ ایران کا بھی کہنا ہے کہ اگر اس پر حملہ کیا گیا تو وہ اسرائیل اور مشرق وسطیٰ میں امریکا کے اہداف کو نشانہ بنائے گا۔