محاصرہ زدہ مقبوضہ فلسطینی علاقے غزہ کی پٹی کو فراہم کیا جانے والا پانی نمکیات کی بہتات کے باعث انسانی تصرف کے لئے انتہائی مضر ہوتا جا رہا ہے۔ اس امر کا انکشاف غزہ کو پانی فراہم کرنے والے ادارے کے نگران منذر شبلاک نے ہفتے کے روز جاری ہونے والی اپنی خصوصی رپورٹ میں کیا ہے۔

منذر شبلاک کے خبردار کیا کہ بین الاقوامی تحقیق اور مطالعوں سے یہ بات ثابت ہو گئی ہے کہ غزہ کے ساحلی شہر کا پانی انسانی تصرف کے لئے ٹھیک نہیں ہے۔ اسرائیلی محاصرے میں زندگی کے روز و شب گذارنے والے اس خطے میں صرف دس فیصد پانی قابل استعمال رہ گیا ہے۔

اپنی رپورٹ میں شبلاک نے اپیل کی ہے غزہ کو فراہم کئے جانے والے میں شوردگی کے عنصر پر قابو پانے کے لئے ہنگامی بنیادوں پر اقدام کئے جائیں۔ علاقے میں سیم و تھور کا مسئلہ انتہائی گھمبیر صورت اختیار کرتا جا رہا ہے۔ انہوں نے غزہ میں پانی کی صورتحال کو انتہائی "پریشان کن" قرار دیا ہے۔

مسٹر منذر شبلاک نے بتایا کہ گذشتہ برس غزہ کے ڈیڑھ ملین نفوس کی پینے اور آبپاشی کی ضروریات کے لئے زمین سے 160 ملین کیوبک میٹر پانی نکالا گیا، اس کے مقابلے میں زیر زمین پانی کی رصد میں قدرتی طور پر صرف 80-90 ملین کیوبک میٹرز اضافہ ہوا۔

منذر شبلاک کے بیان کے مطابق غزہ کے زیر زمین پانی میں سالانہ 80 ملین کیوبک میٹر سالانہ کے حساب سے کمی واقع ہو رہی ہے، اگر یہ صورتحال برقرار رہی تو پانی کے یہ قدرتی سوتے آئندہ چند برسوں میں خشک ہو جائیں گے۔