سعودی عرب کے وزیر داخلہ شہزادہ نائف بن عبد العزیز نے خبردار کیا ہے کہ حاجیوں کی سلامتی کو خطرے میں ڈالنے کی کسی بھی کوشش سے سختی سے نمٹا جائے گا۔
شہزادہ نائف ایرانی عازمین حج کی طرف سے حج کے موقع پر امریکا مخالف مظاہروں سے متعلق خبروں پر تبصرہ کر رہے تھے۔ انہوں نے امید ظاہر کی کہ ایرانی حاجی ایسا اقدام کر کے حکومت کو طاقت کے استعمال پر مجبور نہیں کریں گے۔

انہوں نے کہا کہ ہم کسی کو مناسک حج کے علاوہ کوئی ایسی سرگرمی کی اجازت نہیں دیں گے جو مناسک حج سے متعلق نہ ہو۔ ہم کسی کو بھی مسلمانوں کے اہم دینی رکن کی انجام دہی کو تاراج کرنے یا حاجیوں کو نقصان پہنچانے کی اجازت نہیں دیں گے۔

شہزادہ نائف، جو وزیر داخلہ کے علاوہ حج کے قومی ادارے کے صدر نشین بھی ہیں، کا کہنا تھا کہ انہیں حج کے موقع پر کسی مشکل کی توقع نہیں ہے۔

اتوار کے روز ایک نیوز کانفرنس سے خطاب کرتے ہوئے شہزادہ نائف کا کہنا تھا کہ ہم نے ایرانیوں کے مختلف بیانات سنے ہیں۔ تاہم سعودی عرب میں مقیم ایرانی اہلکار کے حالیہ بیان میں واضح کیا گیا ہے کہ ایرانی حاجی صرف مناسک حج کی ادائی پر اپنی توجہ مرکوز رکھیں گے۔

ایران کا الزام ہے کہ سنی اکثریتی سعودی مملکت میں شیعہ مسلک کے ایرانی حاجیوں سے حج کے موقع پر ناروا سلوک کیا جاتا ہے۔ اس الزام کے حوالے سے سعودی عرب اور ایران کے درمیان تند و تیز بیانات کا تبادلہ کیا جاتا رہا ہے۔