فلسطینی صدر محمود عباس نے کہا ہے کہ اسرائیل کو مشرق وسطیٰ کے بارے میں گروپ چار کے مطالبے پر عمل درآمد کرتے ہوئے مقبوضہ مغربی کنارے میں یہودی بستیوں کی تعمیرکا عمل منجمد کردینا چاہیے جبکہ انتہا پسند اسرائیلی وزیرخارجہ ایویگڈور لائبرمین کا کہنا ہے کہ گروپ کے مطالبے سے امن کے امکانات کو نقصان پہنچنے کا اندیشہ ہے۔

فلسطینی صدر نے جمعہ کوایک بیان میں کہا ہے کہ ''گروپ چارکااسرائیل سے یہودی آبادکاری کی سرگرمیاں معطل کرنے سے متعلق مطالبے پرمبنی بیان بڑی اہمیت کا حامل ہے لیکن سب سے اہم بات یہ ہے کہ اسرائیل کو اس پرعمل درآمد کرنا چاہیے تاکہ امن کا عمل دوبارہ شروع ہوسکے''۔انہوں نے کہا کہ یہودی آباد کاری کا ایشو تمام مسئلے کی جڑ ہے۔

فلسطینیوں کے اعلیٰ مذاکرات کار صائب عریقات نے گروپ چار پر زوردیا ہے کہ وہ نگرانی کا ایک ایسا نظام قائم کرے جو اسرائیل سے مقبوضہ بیت المقدس سمیت تمام مغربی کنارے میں یہودی آبادکاروں کے لیے مکانات کی تعمیر کا عمل رکوانے کے لیے اقدامات کرے۔

انہوں نے انتہا پسند اسرائیلی وزیراعظم بنجمن نیتن یاہو کی دائیں بازو کی حکومت پر الزام عاید کیا کہ اس نے برسرزمین یہودی آبادکاری کے لیے سرگرمیاں جاری رکھی ہوئی ہیں لیکن وہ عالمی برادری کو مسلسل دھوکا دیتے ہوئے یہ بھی کہہ رہی ہے کہ اس نے نئے مکانوں کی تعمیر کے لیے ٹینڈرزطلب کرنے کا سلسلہ بند کردیا ہے۔

دوسری جانب انتہا پسند اسرائیلی وزیرخارجہ ایویگڈور لائبرمین نے کہا ہے کہ گروپ چار کی جانب سے امن معاہدے کے لیے 2012ء کی تاریخ مقررکرنے اور یہودی آبادکاری کے عمل کو روکنے کے لیے مطالبے سے مشرق وسطی امن عمل کو نقصان پہنچے گا۔

انتہا پسند لائبر مین کا برسلزمیں یہودی کمیونٹی سے خطاب میں کہنا تھا کہ ''امن کو مصنوعی طور پر کسی غیرحقیقی کیلنڈر کے ساتھ نافذ نہیں کیا جاسکتا۔گروپ چار کی جانب سے امن معاہدے اوریہودی بستیوں کی تعمیر کو منجمد کرنے کے مطالبے سے متعلق بیانات سے کسی معاہدے تک پہنچنے کے لیے امکانات معدوم ہوجائیں گے اور فلسطینیوں کو بھی یہ تاثر ملے گا کہ وہ براہ راست مذاکرات ناکام ہونے کی صورت میں اپنے مقاصد کے حصول کے لیے دوسرے ذرائع استعمال کرسکتے ہیں''۔