صحافیوں کے لئے پاکستان دنیا کا خطرناک ترین ملک بن گیا

صحافیوں کی بین الاقوامی تنظیم "کمیٹی ٹو پروٹیکٹ جرنلسٹ" نے پاکستان کو صحافیوں کیلئے سب سے خطرناک جگہ قرار دیا ہے ہے۔ یہ بات تنظیم نے سال کے آخر میں کیے جانے والے جائزے میں بتائی ہے۔ جائزہ رپورٹ کے مطابق ایک سال میں فرائض کے انجام دہی کے دوران آٹھ صحافی اپنی جان سے ہاتھ دھو بیٹھے ہیں۔

"کمیٹی ٹو پروٹیکٹ جرنلسٹ" نے اپنے بدھ کے روز جاری کردہ پریس ریلیز میں اس بات کا اعتراف کیا ہے کہ پاکستان اس وقت دنیا بھر میں صحافیوں کیلئے سب سے خطرناک جگہ بن چکا ہے۔ سنہ 2010ء میں دنیا بھر میں 42 صحافی مارے گئے، جن میں سے 8 کا تعلق پاکستان سے تھا۔۔

صحافیوں کی ہلاکتوں کے حوالے سے دوسرا سب سے خطرناک ملک عراق ہے، جہاں پاکستان کے مقابلے میں50 فیصد کم یعنی 4 ہلاکتیں ہوئی ہیں۔ جبکہ تین ہلاکتوں کے ساتھ ہونڈوراس تیسرے نمبر پر رہا۔ کمیٹی ٹو پروٹیکٹ جرنلسٹس2010 کے دوران مارے جانے والے28 ایسے صحافیوں کی موت کی تحقیقات بھی کر رہی ہے جنہیں مشکوک حالات میں ہلاک کیا گیا تھا۔

بین الاقوامی تنظیم کے مطابق صحافیوں کی اتنی بڑی تعداد میں ہلاکتیں حکومت کی جانب سے میڈیا کے خلاف ہونے والے جرائم کی تحقیقات میں ناکامی کے باعث ہیں۔