سعودی عرب میں گذشتہ چار ماہ کے دوران چھیالیس کروڑ ڈالرز مالیت کی منشیات کی اسمگلنگ میں ملوث چھے سو اکاسی افراد کو گرفتار کر لیا گیا ہے۔

سعودی وزارت داخلہ کے ترجمان جنرل منصور الترکی نے اتوار کو ایک نیوز کانفرنس میں بتایا کہ ''گرفتار کیے گئے مشتبہ اسمگلروں میں چھیانوے سعودی اور پانچ سو پچاسی تینتیس دوسرے ممالک سے تعلق رکھتے ہیں۔یہ لوگ منشیات کی اسمگلنگ ،وصولی، منتقلی اور منشیات فروشی کے دھندے میں ملوث تھے''۔

انھوں نے بتایا کہ پکڑی گئی منشیات میں ہیروئین، کوکین، حشیش اور نشہ آور ادویہ شامل ہیں۔ان کی مالیت چھیالیس کروڑ ڈالرز بنتی ہے۔اس کے علاوہ گرفتار افراد سے چوالیس لاکھ ڈالرز کی نقد رقم بھی برآمد کی گئی تھی۔

سعودی حکومت آئے دن منشیات اور خاص طور پر نشہ آور ادویہ کی بھاری مقدار ضبط کرنے اور ان کی اسمگلنگ کو ناکام بنانے کی اطلاعات دیتی رہتی ہے۔گذشتہ ہفتے سعودی حکام نے اردن کے ساتھ واقع سرحد پر پندرہ لاکھ مالیت کی قوت بخش ممنوعہ دوا کپٹاگون اسمگل کرنے کی کوشش ناکام بنانے کی اطلاع دی تھی۔فینتھلین کے نام سے جانی جانے والی اس دوا کا خلیجی اور مشرق وسطیٰ کے ممالک میں استعمال عام ہے۔

واضح رہے کہ سعودی عرب میں حرام کاری، قتل، ارتداد اور مسلح ڈکیتی کی طرح منشیات کی اسمگلنگ کی سزا بھی موت ہے اور اب تک سیکڑوں افراد کے اس جرم میں سر قلم کیے جا چکے ہیں۔