جماعت الدعوۃ کے ترجمان یحییٰ مجاہد نے اس اقدام کو نیٹو سپلائی کی بحالی کی کوششوں اور ڈرون حملوں کے خلاف جدوجہد سے امریکی اہلکاروں کی ہونے والی بوکھلاہٹ قرار دیا گیا ہے۔

یحییٰ مجاہد نے کہا کہ حافظ محمد سعید اور عبدالرحمان مکی پاکستان کے قومی اور دینی رہنماء ہیں اور وہ غاروں میں روپوش نہیں بلکہ اکثر پاکستان میں ان کے پروگرام ہوتے رہتے ہیں اور لاکھوں کی تعداد میں لوگ شریک ہوتے ہیں۔

انہوں نے مزید کہا کہ حملوں کے بعد حافظ سعید کو گرفتار کیا گیا تھا اور ان کی نظربندی کے دوران لاہور ہائی کورٹ اور سپریم کورٹ میں بھی ممبئی کا واقعہ زیر بحث رہا تھا لیکن بعد میں ہائی کورٹ اور پھر سپریم کورٹ کے فل بینچ نے ان کی رہائی کا حکم دیا تھا۔

انہوں نے کہا کہ امریکہ کو پاکستان کی عدلیہ کا احترام کرنا چاہیے اور ایسی کوئی حرکت نہیں کرنی چاہیے جس سے کروڑوں مسلمانوں کی دل آزاری ہو اور امریکہ کے خلاف مزید نفرت ابھرے۔

جماعت الدعوۃ کے بیان میں یہ بھی کہا گیا ہے کہ ان رہنماؤں کی جانب سے قوم کو امریکہ، بھارت اور ان کے اتحادیوں کی سازشوں سے آگاہ کیا جانا امریکہ اور بھارت کے لیے شدید مایوسی کی وجہ ہے اور امریکہ بھارتی پروپیگنڈے سے متاثر ہو کر ہ ’اس قسم کے اوچھے ہتھکنڈے استعمال کر رہا ہے‘۔

ادھر بھارت نے پاکستان میں جماعت الدعوہ کے امیر حافظ سعید کی تلاش کے لیے امریکی حکومت کی طرف سے انعام کے اعلان کا خیر مقدم کیا ہے۔

بھارتی وزیر خارجہ ایس ایم کرشنا نے منگل کو دلی میں صحافیوں سے بات چیت میں کہا کہ بھارت تو پہلے ہی سے حافظ سعید کے خلاف کارروائی کا مطالبہ کرتا رہا ہے۔

ان کا کہنا تھا ’بھارت امریکی حکومت کی طرف سے نوٹیفیکیشن اور انعام کے اعلان کا خیر مقدم کرتا ہے۔ ممبئی حملوں کا ارتکاب کرنے والوں کو سزا دلانے کے لیے دونوں ملک کافی عرصے سے کوشش کرتے رہے ہیں‘۔

بھارتی وزیر خارجہ نے کہا کہ حالیہ برسوں میں دہشت گردی کے خلاف مشترکہ لڑائی میں ’بھارت اور امریکا بہت قریب آئے ہیں کیونکہ دونوں ہی دہشتگردی سے متاثر ہوتے رہے ہیں اور بھارت تو بار بار ہوتا رہا ہے‘۔

ایک سوال کے جواب میں انہوں نے کہا ’میں اس وقت یہی کہنا چاہتا ہوں کہ امریکا جب بھی حافظ سعید کے خلاف کارروائی کرے بھارت اس سے قطعی طور پر مطمئن ہے۔ کیونکہ ہم اس بات پر زور دیتے رہے ہیں کہ ممبئی حملے کے پیچھے انہی کا ذہن تھا اور دہشت گردی کے لیے سازش کرنے والوں کو بخشا نہیں جانا چاہیے‘۔