برطانوی وزیر خارجہ ولیم ہیگ نے دمشق کو خبردار کیا ہے کہ شامی بحران کے حل کی خاطر یو این اور عرب لیگ کے مشترکہ مندوب کوفی عنان کا پیش کردہ نقشہ راہ پرعمل درآمد نہ کرنے کی صورت میں برطانیہ پر شامی فائل سیکیورٹی کونسل اور بشار الاسد کا کیس بین الاقوامی جرائم عدالت پیش کرنے کے لئے دباؤ بڑھ جائے گا۔

"اگر کوفی عنان کا منصوبہ ناکام ہو گیا اور شامی حکومت نے اس پر عملدرآمد کے لئے کچھ نہ کیا تو ہم [برطانیہ] سیکیورٹی کونسل جانے پر مجبور ہوں گے۔" مسٹر ہیگ کے مطابق برطانیہ ساری دنیا کو یہ بتائے گا کہ شامی حکومت ہی ملک میں امن منصوبے کی کامیابی کی راہ میں رکاوٹ ہے۔ انہوں نے بتایا کہ برطانیہ مختلف طریقوں سے شامی حکومت مخالف جماعتوں کی امداد بڑھانے پر غور کر رہا ہے۔

ادھر فرانس نے بھی دمشق پر اپنی ذمہ داریاں ادا کرنے میں "سستی" کا مظاہرہ کرنے کا الزام عائد کیا ہے۔ فرانسیسی وزیر خارجہ آلن جوبے کا کہنا ہے کہ کوفی عنان کا سیکیورٹی کونسل کے نام حالیہ مراسلہ دمشق کے اپنی ذمہ داریاں پوری کرنے میں ناکامی کا منہ بولتا ثبوت ہے۔

یو این میں امریکا کی مستقل مندوب سوزان رائس نے کہا ہے کہ سیکیورٹی کونسل جلد ہی شام سے متعلق ایک نیا منصوبہ پیش کرے گی جس کے تحت اسد حکومت پر عالمی برادری کے مینڈیٹ کے احترام کے لئے دباؤ ڈالا جائے گا۔