افریقی ملک مراکش کی مختلف جامعات اور ان کے زیر انتظام کالجوں میں طلباء، اساتذہ، سیکیورٹی اہلکار یا دیگر ملازمین کی جانب سے درسگاہ کے اصول ومبادی کی خلاف ورزی پر"طلباء عدالتوں" کا نیا رحجان سامنے آیا ہے۔ گو کہ یہ عدالتیں علامتی ہیں تاہم ان کے تحت قوانین کی خلاف ورزی کے مرتکب افراد کو دی جانی والی معمولی نوعیت کی سزاؤں سے جامعات کا ماحول بہتر ہونے لگا ہے۔

"العربیہ ڈاٹ نیٹ" کے مطابق مراکش کی یونیورسٹیوں میں طلباء عدالتوں میں درسگاہ کے اپنے قواعد و ضوابط کی خلاف ورزی کرنے والوں کو جیوری کے سامنے پیش کیا جاتا ہے۔ ان میں اساتذہ، طلباء اور دیگر ملازمین کے مابین کوئی استثنیٰ نہیں ہوتا۔ جرم ثابت ہونے کی صورت میں ملزم کا سر منڈوانے، اسے ادارے سے نکالنے یا سر زنش اور وارننگ جیسی سزائیں دی جاتی ہیں۔

رپورٹ کے مطابق طلباء عدالتوں کے جج بھی خود طلباء ہی ہوتے ہیں۔ جب کسی ملزم یا ملزمان کےخلاف عدالت لگائی جاتی ہے تو جج حضرات اپنے چہرے ڈھانپ کر رکھتے ہیں تاکہ ان کی نشاندہی نہ ہو سکے۔ گواہوں اور عینی شاہدین کی موجودگی میں لگائی جانے والی عدالت میں مدعی اور مدعا علیہ دونوں کو اپنے اپنے حق میں دلائل دینے کا موقع فراہم کیا جاتا ہے۔ کسی ملزم کو چاہے وہ طالب علم ہی کیوں نہ چوری کے جرم میں عدالت میں لایا جائے اور جرم ثابت ہونے کی صورت میں اس کا سرمنڈوا دیا جاتا ہے، جرم کی نوعیت کے اعتبارسے اسے ادارے سے نکالا بھی جا سکتا ہے۔