پاکستان کی شورش زدہ شمال مغربی سرحدی پٹی کے قریب واقع شہر بنوں کی سینٹرل جیل پر آدھی رات کے وقت نامعلوم افراد کے حملے میں 400 کے قریب قیدیوں کے فرار ہونے کی تصدیق کی گئی ہے۔

بنوں جیل پر حملے کے دوران حملہ آوروں نے دستی بموں کے علاوہ راکٹ کا بھی استعمال کیا۔ اس کی وجہ سے جیل کی بیرونی دیوار میں کئی مقامات پر شگاف پیدا ہو گئے۔ حملے کے دوران 384 قیدی فرار ہو گئے۔ ان قیدیوں میں 150 وہ قیدی ہیں، جن کا تعلق کالعدم طالبان سے ہے۔ صوبے خیبر پختونخوا کے اعلیٰ پولیس افسر شفیق خان نے اس حملے کی تصدیق کر دی ہے۔ جیل پر فائرنگ اور بم حملے سے علاقے میں خوف و ہراس پھیل گیا ہے۔

پولیس حکام کے مطابق جیل سے فرار ہونے والے قیدیوں میں کم از کم بیس قیدی انتہائی خطرناک طالبان انتہا پسند تھے، جو پ رتشدد واقعات اور جرائم میں ملوث تھے۔ فرار ہونے والوں میں ایک عدنان رشید نامی قیدی بھی شامل ہے جو سابق فوجی صدر پرویز مشرف کے قتل کے وقوعے میں شامل تھا۔ عدنان رشید پاکستان فضائیہ کا ملازم تھا اور اسے موت کی سزا سنائی جا چکی ہے۔ حکام کے مطابق حالیہ کچھ عرصے کے دوران لکی مروت اور کو ہاٹ نامی شہروں سے بھی کئی قیدیوں کو بنوں کی جیل منتقل کیا گیا تھا۔

طالبان کے ایک ترجمان عاصم اللہ محسود نے اس واقعے کی ذمہ داری قبول کرنے کا اعلان کیا ہے۔ طالبان کے ترجمان کے مطابق ان کے جنگی فائٹرز نے جیل پر حملہ کیا تھا۔ ترجمان کے مطابق حملے میں کل بارہ سو قیدیوں کو رہائی دلوائی گئی ہے۔ جیل حکام نے طالبان کے دعوے کو تسلیم کرنے سے انکار کیا ہے۔ جیل حکام کے مطابق ہفتے کی شام کو قیدیوں کی مکمل گنتی کے مطابق ان کی تعداد 944 تھی۔