امریکی محکمہ دفاع پینٹاگان نے حقانی نیٹ ورک کے جنگجوؤں پر افغان دارالحکومت کابل اور تین دوسرے صوبوں میں اہم عمارتوں اور غیرملکی سفارت خانوں پر بڑے حملے میں ملوث ہونے کا الزام عاید کیا ہے جبکہ امریکی وزیرخارجہ ہلیری کلنٹن کا کہنا ہے کہ حقانی نیٹ ورک ایک سخت جان دشمن ہے۔وہ اس کے خلاف کارروائی کے لیے پاکستان پر دباؤ ڈالتی رہيں گی۔

امریکی محکمہ دفاع پینٹاگان کے پریس سیکرٹری جارج لٹل نے سوموار کو واشنگٹن میں صحافیوں سے گفتگو کرتے ہوئے کہا کہ ''ابتدائی اشاریوں سے ظاہرہوتا ہے کہ حقانی نیٹ ورک کابل میں اتوار کو ہوئے حملوں میں ملوث ہے''۔

واضح رہے کہ امریکی عہدے دار ماضی میں بھی حقانی نیٹ ورک پر افغانستان میں فوجی تنصیبات اور غیرملکیوں پربڑے حملوں اور مزاحمتی کارروائیوں میں ملوث ہونے کے الزامات عاید کرتے رہے ہیں۔ ان کا کہنا ہے کہ حقانی نیٹ ورک کے جنگجوؤں نے پاکستان کے شمال مغربی پہاڑی علاقوں میں پناہ لے رکھی ہے جہاں سے وہ افغانستان میں داخل ہوکر غیرملکی فوجوں پر حملے کرتے رہتے ہیں۔

مسٹر جارج لٹل نے اعتراف کیا کہ جنگجوؤں نے بڑے ہی منظم اور مربوط انداز میں حملے کیے تھے لیکن افغان سکیورٹی فورسز نے موثر انداز میں جوابی کارروائی کرکے ان پر قابو پایا ہے۔

ترجمان نے کہا کہ ''افغانستان میں موسم بہار کے آغاز پر اس طرح کے حملے سے ہمیں کوئی حیرت نہیں ہوئی کیونکہ جنگ زدہ ملک میں اس موسم میں بالعموم لڑائی میں شدت آجاتی ہے اور ہم اس طرح کی کارروائی کی توقع کررہے تھے اور ایسا ہوگیا ہے''۔

افغان صدر حامد کرزئی نے کابل اور دوسرے علاقوں میں حملوں کو افغان اور خاص طور پر نیٹو کی قیادت میں فوج کی انٹیلی جنس ناکامی کا نتیجہ قراردیا ہے لیکن پینٹاگان کے ترجمان کا کہنا تھا کہ یہ توقع کرنا حقیقت پسندانہ نہیں ہوگا کہ اتحادی فوج کو مزاحمت کاروں کی ہر کارروائی کا پیشگی علم ہو۔

انھوں نے کہا ''میں اس بات میں یقین نہیں رکھتا کہ یہ ایک انٹیلی جنس ناکامی ہے۔البتہ ہمیں اس بات کا احساس تھا کہ اس طرح کا واقعہ رونما ہوسکتا ہے''۔ترجمان نے اس حملے کے ویت نام جنگ کے دوران نئے سال کے آغاز کے موقع پر شمالی ویت نام کی فوج کے امریکی فوج پر بھرپور حملے سے موازنے کو مسترد کردیا اور کہا کہ یہ کوئی بڑے پیمانے پر فوجی کارروائی نہیں تھی بلکہ یہ دہشت گردی کے حملوں کا ایک سلسلہ تھا''۔

مسٹر جارج لٹل نے کہا کہ ''میں اس حملے کی سنگینی اور شدت کو کم نہیں کررہا ہوں لیکن ان کا کسی طرح بھی ویت نام حملے سے موازنہ نہیں کیا جاسکتا ہے''۔