اخوان المسلمون کے مستعفی مرکزی رہ نما ڈاکٹر کمال الھلباوی نے جماعت کے صدارتی انتخابات میں حصہ لینے کے فیصلے پر سخت تنقید کی ہے۔ ان کا کہنا ہے کہ اخوان المسلمون کو صدارتی انتخابات نہ لڑنے کے اپنے وعدے پر عمل کرنا چاہیے تھا۔

ان خیالات کا اظہار اخوان المسلمون کے رہنما نے"العربیہ" ٹی وی کے فلیگ شپ پروگرام "اسٹوڈیو قاہرہ" میں صحافی محمود الورواری کے ساتھ خصوصی بات چیت کرتے ہوئے کیا۔

سلفی جماعت "النور" کے صدارتی امیدوار حازم ابو اسماعیل کے کاغذات نامزدگی مسترد ہونے اور سلفیوں کے اس پر احتجاج کی حمایت کرتے ہوئے ڈاکٹر الھلباوی کا کہنا تھا کہ الیکشن کمیشن نے سلفیوں پر ظلم کیا ہے۔ اپنے ساتھ ہونے والی زیادتی کے شعور نے انہیں سڑکوں پر احتجاج پر مجبور کیا ہے۔

سلفی امیدوار حازم ابو اسماعیل کی والدہ کے امریکی شہری ہونے کے تنازع کے بارے میں انہوں نے کہا کہ" یہ بات میری سمجھ سے بالا تر ہے کہ ابو اسماعیل کو اپنی والدہ کی امریکی شہریت کے بارے میں علم کیوں نہیں تھا؟ اگر انہیں علم تھا انہیں ناک کی سرجری کرا کر جھوٹ بولنے والے سلفی رہنما کی طرح جھوٹ نہیں بولنا چاہیے تھا۔

الیکشن کمیشن کی جانب سے اخوان المسلمون کے امیدوار خیرت الشاطر کے کاغذات نامزدگی مسترد کیے جانے پر جماعت کے کارکنوں کے کمیشن کے دفتر کے باہر دھرنے کی مخالفت کرتے ہوئے الھلباوی نے کہا کہ اخوان کی قیادت نے پہلے صدارتی انتخابات میں حصہ نہ لینے کا اعلان کیا تھا۔

انہوں نے کہا کہ جماعت کو اپنے اس دعوے اور اعلان پر قائم رہنا چاہیے تھا۔ انہوں نے جماعت کے شعبہ دعوت ارشاد کے انتخابات کی شفافیت پر بھی اعتراض کیا۔ سابق رہ نما کا کہنا تھا کہ اخوان المسلمون کی قیادت پارلیمانی اور صدارتی انتخابات کی شفافیت کا مطالبہ کرنے سے قبل تحریر چوک میں دعوت وارشاد کے شفاف انتخابات کرانے چاہئیں۔

ڈاکٹر کمال الھلباوی کا کہنا تھا کہ اخوان المسلمون مابعد انقلاب جس پوزیشن پر کھڑی ہے مجھے اس پر گہرا دکھ ہے کیونکہ جماعت کے اسپیکر پارلیمنٹ ڈاکٹر سعد الکتاتنی خود کو حسنی مبارک کے دور کے اسپیکر فتحی سرور ثابت کر رہے ہیں۔ پارلیمنٹ کے اسپیکر کو تمام جماعتوں کے ساتھ توازن کی پالیسی پر چلنا ہوتا ہے لیکن الکتاتنی اس سے محروم ہیں۔