بعد ازاں اجلاس میں شیخ علی جمعہ بھی شریک ہوئے اور اسرائیلی ویزے پر مسجد اقصیٰ کے دورے کے بارے میں وضاحت بیان کی۔ انہوں نے کہا کہ مسجد اقصیٰ کا ان کا یہ دورہ نجی نوعیت کا تھا کوئی سرکاری دورہ نہیں تھا۔ ان کی مسجد اقصیٰ میں آمد کو حکومت کی پالیسی نہ خیال کیا جائے۔

انہوں نے مزید وضاحت کی وہ اسرائیلی ویزے پر مسجد اقصیٰ اور بیت المقدس نہیں گئے بلکہ اردن کی جانب سے انہیں وہاں ذاتی نوعیت کے علمی اور دینی امور نمٹانے کے لیے خصوصی اجازت نامہ دلوایا گیا تھا۔ انہوں نے کہا کہ مقبوضہ عرب علاقوں کا ان کا دورہ مکمل طور پر اردنی حکومت کی نگرانی میں ہوا اور مسجد اقصیٰ جاتے ہوئے انہیں راستے میں کوئی اسرائیلی نہیں ملا اور نہ ہی مسجد اقصیٰ میں اسرائیلی پولیس کی جانب سے انہیں کوئی پروٹوکول یا سیکیورٹی فراہم کی گئی تھی۔

اسرائیل کے ساتھ تعلقات کے عدم قیام کے بارے میں شیخ علی جمعہ نے کہا کہ ان کی پالیسی میں تبدیلی نہیں آئی بلکہ وہ اب بھی مسجد اقصیٰ اور بیت المقدس کے بارے میں مصری علماء کے وضع کردہ خطوط پر عمل پیرا ہیں۔ البتہ ان کا دورہ مسجد اقصیٰ نجی تھا اور وہاں نماز ادا کر کے انہیں خوشی ہوئی۔

ان کے اس بیان کے بعد اجلاس کے مشترکہ اعلامیے میں کہا گیا کہ شیخ علی جمعہ کے دورہ مسجد اقصیٰ کو جامعہ الازھر کا نمائندہ دورہ نہ سمجھا جائے۔ اعلامیے میں فلسطینی شہریوں کے حق خود ارادیت سمیت تمام مسلمہ حقوق کی حمایت کی گئی اور عالمی برادری سےمطالبہ کیا گیا کہ وہ بیت المقدس میں یہودیت کےفروغ کے سلسلے میں جاری اسرائیلی سرگرمیوں پر پابندی لگوائے۔

خیال رہے کہ مفتی دیار مصر شیخ علی جمعہ نے بدھ کے روز اردن کی ایک اہم شخصیت کے ہمراہ مسجد اقصیٰ کا دورہ کیا تھا، جس پرفلسطین اور مصر سمیت کئی دوسرے ممالک کے دینی حلقوں کی جانب سے بھی سخت برہمی کا اظہار کیا گیا تھا۔