مصر کی جانب سے گیس کی فراہمی روکے جانے کی اطلاعات پر اسرائیل کا سخت ردعمل سامنے آیا ہے۔ اسرائیلی وزیر مالیات "یو وال چٹائنٹز" نے فیصلے کو سیاسی اور اقتصادی قرار دیتے ہوئے اس پر سخت تشویش کا اظہار کیا ہے۔

اسرائیلی ریڈیو سے گفتگو کرتے ہوئے وزیر مالیات نے کہا کہ قاہرہ کی جانب سے تل ابیب کو گیس کی فراہمی روکے جانے کا اعلان نہایت خطرناک ہے، جس کےنتیجے میں دونوں ملکوں کے درمیان طے پائے کیمپ ڈیوڈ امن معاہدے کی منسوخی کی راہ ہموار ہو گی۔ انہوں نے کہا کہ ہمیں یہ خبرسن کر نہایت مایوسی اور سخت قلق ہے کیونکہ ہم پڑوسی عرب ملک سے گیس کی مقدار دوگنا کرنا کی کوشش کر رہے تھے لیکن قاہرن نے پہلی گیس بھی روک دی۔

مصر سے گیس روکے جانے کے اثرات پر بات کرتے ہوئے مسٹر یووال کا کہنا تھا کہ اس اقدام سے اسرائیل میں گیس کی کمی کے ساتھ توانائی کا بحران پیدا ہونے کا اندیشہ ہے اور بجلی کی قیمتوں میں بھی اضافہ ہو سکتا ہے۔ مصر کی جانب سے گیس روکے جانے کےاعلان پر اسرائیلی اپوزیشن لیڈر شاؤل موفاز نے بھی سخت تنقید کی ہے۔ انہوں نے کہا کہ اسرائیل کو گیس کی فراہمی روکے جانے سے تل ابیب ۔ قاہرہ تعلقات پر گہرے منفی اثرات مرتب ہوں گے اور اہم اسے امن معاہد ے کی سنگین خلاف ورزی قرار دیں گے۔

اپنے ایک بیان میں صہیونی اپوزیشن لیڈر کا کہنا تھا کہ امریکی کمپنی "امیال" نے قاہرہ حکومت کے خلاف عدالت میں مقدمہ چلانے کا اعلان کیا ہے۔ ایک دوسرے سیاسی رہ نما سلفان شالوم کا کہنا ہے کہ قاہرہ کا تل ابیب کو قدرتی گیس روکنا اپنے اندر سیاسی مقاصد رکھتا ہے۔ اسرائیل سے زیادہ امریکا کو مصری حکومت کے اس اقدام کی خبر لینی چاہیے کیونکہ امریکا کسی بھی دوسرے ملک سے بڑھ کر مصری حکومت کی مدد کر رہا ہے۔

درایں اثناء اسرائیلی میڈیا میں اسرائیل کے ساتھ گیس معاہدے کی منسوخی کی خبروں کو بڑھا چڑھا کر پیش کیا جا رہا ہے۔ اسرائیلی الیکٹرانک اور پرنٹ میڈیا پر کیے جانے والے تبصروں میں اسے مذہبی جماعت اخوان المسلمون کی کامیابی کا شاخسانہ قرار دیا جا رہا ہے۔

اسرائیلی کے کثیر الاشاعت عبرانی اخبار"معاریف" نے اپنی رپورٹ میں لکھا ہے کہ گیس کی فراہمی کا معاہدہ منسوخ کیا جانا اسرائیل کے لیے ایک بڑا صدمہ ہے۔ ہم اچھی طرح جانتے ہیں کہ اس فیصلے کے پیچھے اخوان المسلمون اور اس کے سیاسی ونگ"آزادی وانصاف" کا ہاتھ ہے جو ماضی میں بھی اسرائیل کو گیس کی فراہمی روکنے کے اعلان کرتی رہی ہے۔