فاضل ایرانی کالم نگار مزید لکھتے ہیں "کہ متحدہ عرب امارات کوئی گئی گذری ریاست نہیں۔ عرب اور عالمی دنیا میں یو اے ای کی اہمیت کویت سے کم نہیں ہے۔ کویت کو عراق سے جب خطرات لاحق ہوئے تو گرد وپیش کے تمام عرب ممالک اور مغربی دنیا کویت کی اہمیت باور کرانے کی خاطر عراق کے خلاف اٹھ کھڑی ہوئی تھی۔

متحدہ عرب امارات اور ایران کا تنازعہ بھی ایسا ہی ہے۔ ایران نے متحدہ عرب امارات کو دھمکیاں دیتے ہوئے متنازعہ جزیروں پر زبردستی تسلط جمانے کی کوشش کی تو ایسے میں یو اے ای کے ہمسایہ عرب ملک اس کا ویسے ہی ساتھ دیں گے جیسے عراقی جارحانہ عزائم کے اظہار پر انہوں نے کویت کا ساتھ دیا تھا۔

ماہر سیاسی اور دفاعی امور شہاب طیبی نے صف اول کی ایرانی قیادت کو کھل کر تنقید کا نشانہ بنایا ہے۔ وہ لکھتے ہیں: "صدر محمود احمدی نژاد کا ہنگامی دورہ جزیرہ ابو موسیٰ قوم کے باشعور طبقے کی سمجھ سے بالاتر ہے۔ ایسا لگتا ہے کہ ہمارے چشم بدور رہنما سنہ دو ہزار بارہ میں نہیں بلکہ نصف صدی قبل کی دنیا میں رہ رہے ہیں۔ انہیں یہ اندازہ نہیں کہ دنیا کس تیزی سے بدل رہی ہے اور تیزی سے بدلتی دنیا میں ایران کا ہمسایہ ممالک کے ساتھ رویہ کیسا ہونا چاہیے۔ تنازعات کے منصفانہ اور پرامن حل کا کیا راستہ ہونا چاہیے"۔

بہ قول شہاب طیبی ایرانی قیادت کو صدام حسین کی طرح طاقت کے نشے سے باہر نکل آنا چاہیے۔ مصلوب عراقی صدر صدام حسین کے کویت پر حملے کے وقت اس کا بھی یہ دعویٰ تھا کہ وہ کویت سے کہیں زیادہ طاقتور ہے لیکن وہ عرب اور مغربی دنیا میں کویت کی اہمیت کا اندازہ لگانے میں ناکام رہے۔

صدام حسین اگر آج زندہ ہوتے تو وہ بتاتے کہ کویت پر عراقی حملے کی انہیں کتنی بھاری قیمت چکانا پڑی۔ انہیں انتہائی ذلت سے عراق سے نکلنا پڑا اور بعد میں ایسی سخت عالمی پابندیوں کا سامنا کرنا پڑا کہ آخر کار عراقی حکومت تیل برائے خوراک جیسے معاہدوں پر مجبور ہو گئی تھی۔