مصر میں لبنان کے ایک سرکردہ شیعہ رہ نما کی سرگرمیوں اور حسینیہ شیعہ فرقے کی جماعت کے قیام پر علماء کا شدید ردعمل سامنے آیا ہے۔

مصر کی سب سے بڑی دینی درسگاہ جامعہ الازھر کے علماء، اسلامک ریسرچ اکیڈمی سے وابستہ مذہبی شخصیات اور وزارت اوقاف کے علماء نے شیخ علی الکورانی کے مصر کے دوروں اور اہل تشیع کے گھروں میں حسینیہ فرقے کے پروگرامات منعقد کرنے پر سخت تنقید کی ہے۔

ان علماء کا کہنا ہے کہ شیعہ لیڈر علی الکورانی قاہرۃ اور دوسرے شہروں میں نہایت متنازعہ طریقے سے اہل تشیع کے حسینیہ گروپ کو منظم کر رہے ہیں۔ حالیہ کچھ عرصے سے مصرمیں اہل تشیع کے گھروں میں منعقد ہونے والے پروگرامات میں شرکت کرکے انہوں نے امام مہدی منتظر کے ظہور کی بشارت، ان کےنسب اور ذریت سمیت کئی دیگر متنازعہ نوعیت کے مسائل پر تقاریر کی بھی کی ہیں۔

"العربیہ ڈاٹ نیٹ" کے مطابق لبنانی نژاد شیعہ رہ نما ان شیخ علی الکورانی ایران کے مذہبی مرکز"قُم" میں مقیم ہیں اور وہ ایران کی تحریک دعوت اسلامی کے ایک سرکردہ رہ نما رہ چکے ہیں تاہم کچھ عرصہ قبل انہوں نے اس سے علاحدگی کا اعلان کردیا تھا۔ اب وہ صرف اپنے ایک خاص فلسفے کے مطابق امام مہدی منتظر کے ظہور کے بارے میں ایک آگاہی مہم چلا رہے ہیں۔ ایران کے شہر "قم "اور عراق کے "نجف" سمیت کئی دوسرے عرب ملکوں میں بھی ان کے ہزاروں ہم خیال اہل تشیع موجود ہیں، جن میں کئی سرکردہ شیعہ مذہبی اور سیاسی رہ نما بھی شامل ہیں۔

جامعہ الازھر کی جانب سے شیخ الکورانی کے مصر میں میں حسینیہ شیعہ فرقے کو منظم کرنے کی کوششوں کی شدید مذمت کی ہے۔ شیخ الازھر ڈاکٹر احمد الطیب کے سیکرٹری ڈاکٹر محمد کا کہنا ہے کہ اسلامک ریسرچ اکیڈمی کی طرف سے پہلے بھی شیخ علی الکورانی کی نا مناسب سرگرمیوں کی مذمت میں ایک بیان جاری کیا جا چکا ہے۔ لیکن اس کے باوجود وہ باز نہیں آ رہے ہیں۔

انہیں اطلاعات ملی ہیں کہ شیخ الکورانی مصری شیعوں کو منظم کرنے کے لیے ان کے گھروں میں اجلاس منعقد کرتے پھرتےہیں۔ وہ اس کی بھرپورمذمت کرتے ہیں۔ ڈاکٹر محمد نے کہا کہ ہم نے اہل سنت و الجماعت کے علماء کو اہل تشیع میں اپنے مسلک کی دعوت پھیلانے سے روک دیا تھا، اہل تشیع کو بھی ایسی سرگرمیوں سے احتراض کرنا چاہیے۔ اس طرح کی دعوتی تحریکوں سے فتنہ اور فساد جنم لیتے ہیں جس کا نتیجہ خون خرابے کے سوا کچھ نہیں ہوسکتا۔

جامعہ الازھرکے عہدیدار نے کہا کہ قرآن ہمیں تفرقہ بازی کی نہیں بلکہ "واعتصموا بحبل اللہ" یعنی اللہ کی رسی کو مضبوطی سے تھامے رکھنے کی تلقین کرتا ہے۔ جامعہ الازھر مصرمیں کسی ایسی فرقے کی کھلےعام دعوت کی اجازت نہیں دے گی جو ہماری قوم میں فساد کا موجب بنے۔