مصر کا ایک ساٹھ رکنی وفد کل بدھ کو ایران پہنچا ہے۔ وفد میں کئی اہم شخصیات بھی شامل ہیں۔ فی الحال اس وفد کے دورے کے اہداف ومقاصد اور اس کی غرض غایت کے بارے میں کوئی مصدقہ اطلاعات نہیں، محض قیاس آرائیاں اور متضاد اطلاعات آ رہی ہیں۔

ایران کا سرکاری میڈیا اس دورے کو محض "مطالعاتی" اور علمی دورہ قرار دے رہا ہے جبکہ ایرانی اپوزیشن کا کہنا ہے کہ یہ دورہ تہران اور قاہرہ کے درمیان ایک طے شدہ پروگرام کا حصہ ہے جس کے تحت سنہ 1979ء کے بعد سے دونوں ملکوں کے درمیان پائے جانے والے سفارتی تعطل کو ختم کرنے کی راہ ہموار کرنا ہے۔

ایران کی نیم سرکاری خبر رساں ایجنسی" مہر" نے مصر کے اس "گرینڈ وفد" کی تہران آمد کو خوب کوریج دی ہے۔ رپورٹ کے مطابق ایران میں سنہ 1979ء میں امام خمینی کی قیادت میں برپا ہونے والے شیعہ ولایت فقیہ کے انقلاب کے بعد یہ مصر کا سب سے بڑا وفد ہے۔ تاہم اس کا مقصد ایران کے ساتھ سفارتی تعلقات کی بحالی نہیں البتہ یہ ایک علمی اور مطالعاتی "ٹور" ہے۔

ادھر ایران میں عرب بہاریہ سے معاملات کرنے کے لیے بنائی گئی "عظمت اسلام موومنٹ" نے بھی مصری وفد کے دورے کو محض" مطالعاتی" "ٹور" قرار دیا ہے۔ تا ہم موومنٹ کا کہنا ہے کہ مصری وفد اپنے اس "غیر سرکاری" دورے کے دوران بھی سپریم لیڈر رہ بر انقلاب اسلامی آیت اللہ علی خامنہ ای کے مشیر اور سابق وزیر خارجہ ڈاکٹر علی اکبر ولایتی سے ملاقات کرے گا۔

ایرانی اپوزیشن حلقوں کی جانب سے سامنے آنے والی اطلاعات میں بتایا گیا ہے کہ مصر سے آئے مہمان وفد کو سرکاری پروٹوکول دیا جائے گا۔ اس وفد کی آمد کا مقصد کئی سال سے دونوں ممالک کے درمیان پائے جانے والے سفارتی تعطل کو ختم کرنے کے لیے مذاکرات کرنا ہے۔ وہ اسی سلسلے میں ایرانی سپریم لیڈر کے معاون خصوصی سے بھی ملاقات کرے گا۔

ایران میں سوشلسٹ پارٹی کے"تودہ" کے قریب سمجھی جانے والی ویب سائٹ" بیک ڈاٹ نیٹ" نے ذرائع کےحوالے سےخبر دی ہے کہ ایران پہنچنے والے مصری وفد کی آمد کا مقصد دونوں ملکوں کے درمیان سفارتی تعلقات کا دروازہ کھولنے کےلیے مذاکرات کرنا ہے۔