یورپی یونین نے شام میں صدر بشار الاسد کی سکیورٹی فورسز کی مظاہرین کے خلاف جاری کریک ڈاؤن کارروائیوں کے بعد مزید دو فرموں اور تین شخصیات پر پابندیاں عاید کرنے کا فیصلہ کیا ہے۔ اقتصادی پابندیوں کا ایک نیا پیکج پرسوں پیر سے نافذ کیا جائے گا۔

"العربیہ ڈاٹ نیٹ" کےمطابق یورپی سفارتی ذرائع کا کہنا ہے کہ یورپی یونین کے ستائیس رُکن ممالک کے سفیروں نے شامی صدر کےخلاف پابندیوں کی پانچویں قسط کا ابتدائی مسودہ تیار کر لیا ہے۔ یہ پابندیاں شامی حکومت کے خلاف اس لیے لگائی جا رہی ہیں کیونکہ صدر بشار الاسد اور ان کی حکومت ایک سال سے جاری عوامی بغاوت کی تحریک کے دوران نہتے شہریوں پر مظالم ڈھا رہی ہے اور ان کے جمہوری حقوق کی فراہمی میں سخت کوتاہی کی مرتکب ہے۔

سفارتی ذرائع کا کہنا ہے کہ پابندیوں کی نئی قسط کی زد میں آنے والی شخصیات یورپی یونین کے کسی بھی رکن کا ملک کا سفر نہیں کر سکیں گی۔ سفیروں کے تیار کردہ پابندیوں کےمسودے کی باضابطہ منظوری پیر کو یورپی وزراء خارجہ کے برسلزمیں ہونے والے اجلاس میں دی جائے گی۔

خیال رہے کہ یورپی یونین نے اپریل میں شام کےخلاف اقتصادی پابندیوں کی چوتھی قسط میں صدر اسد اور ان کی اہلیہ کی یورپی ملکوں سے شاہانہ شاپنگ پر پابندی عائد کر دی تھی۔ گذشتہ ایک سال سے اب تک یورپی یونین اور امریکا کی جانب سے شام کی 126 شخصیات اور 41 کمپنیوں پر پابندیاں عائدکی جا چکی ہیں۔ ان میں شام کا مرکزی بنک، مال بردار طیاروں کے کرائے پر حصول اور قیمتی معدنیات کی تجارت پر پابندیاں شامل ہیں۔ اس کے علاوہ یورپی یونین شامی تیل کی فروخت اور دمشق کو اسلحہ کی فراہمی روکنے کی پابندیاں لگا چکی ہے تاہم انہیں مزید سخت کرنے پر غور ہو رہا ہے۔