عراق میں امریکی اور غیر ملکی فوج کے خلاف لڑنے والے القاعدہ کے ایک سابق کمانڈر نے دعویٰ کیا ہے کہ جمعرات کے روز شامی دارالحکومت دمشق میں ہونے والے بم دھماکوں میں شامی انٹیلی جنس کا ہاتھ ہے۔ انہوں نے الزام عائد کیا کہ عراق جنگ کے دوران شامی حکومت شدت پسند تنظیم القاعدہ کی معاونت کرتی رہی ہے۔

العربیہ ڈاٹ نیٹ کے مطابق القاعدہ کے سابق کمانڈر ابو عمر نے ان اطلاعات کی سختی سے تردید کی ہے کہ اس کا کسی نہ کسی شکل میں آبائی تعلق شام کے شہر حلب سے ہے۔ تاہم اس کا کہنا ہے کہ شام میں جاری تحریک انقلاب کے دوران القاعدہ کا کوئی کردار نہیں۔ جہاں کہیں بم دھماکے ہو رہے ہیں ان میں سرکاری خفیہ اداروں کا ہاتھ ہوتا ہے۔ حال ہی میں دمشق میں ہونے والے دو جڑواں بم دھماکے کافی حد تک سنہ 2005ء میں بیروت کے قریب ہونے والے ان دھماکوں سے مماثلت رکھتے ہیں، جن میں سابق لبنانی وزیر اعظم رفیق حریری مارے گئے تھے۔

ابو عمر نے دمشق میں ہونے والے بم دھماکوں کے بارے میں مزید کہا ہے کہ ان دھماکوں میں جو تکنیک استعمال کی گئی ہے وہ باغیوں کے طریقہ جنگ سے قطعی مختلف ہے۔ ان دھماکوں میں ابتدائی طور پر جن پندرہ مہلوکین کے نام سامنے آئے تھے وہ تمام حکومتی تحویل میں موجود باغیوں کے حامی افراد کے تھے۔ سرکاری فوج کا یہ دعوٰی غلط ہے کہ وہ قیدیوں کو کسی دوسرے مقام پر منتقل کرنا چاہتے تھے لیکن باغیوں نے ان کی گاڑیوں پر حملہ کیا۔ باغی کم سے کم اپنے ساتھیوں کی اس طرح بہیمانہ طریقے سے ہلاکت کا نہیں سوچ سکتے۔ یہ دھماکے ایک منصوبے کے تحت کیے گئے تھے جن کا ماسٹر مائنڈ خود شام کی خفیہ ایجنسیاں تھیں۔

القاعدہ کمانڈر نے سنہ 2008ء میں شام کے شہر "القزاز"میں ہونے والے بم دھماکوں کی ذمہ داری شدت پسند دینی جماعتوں پر عائد کرتے ہوئے کہا کہ چار سال قبل ہونے والے ان حملوں میں القاعدہ کے ایک کمانڈر ابو عائشہ نے سیکیورٹی فورسز کی بس کو دھماکے سے اڑانے کی جو ذمہ داری قبول کی تھی وہ دُرست تھی کیونکہ یہ ابو عائشہ ہی کی کارروائی تھی۔ تاہم گذشتہ برس جب شام میں عوامی بغاوت کی تحریک نے سر اٹھایا ہے کہ القاعدہ نے کوئی کارروائی نہیں کی۔