اُدھر دمشق کے نواحی علاقے دوما میں سرکاری فوج کے ہاتھوں شہریوں کے بہیمانہ قتل کی ایک نئی ویڈیو فوٹیج سامنے آئی ہے۔ شامی نشینل کونسل اور باغیوں کے میڈیا سینٹر کی جانب سے قتل عام کی نئی واردات کی تصدیق کرتے ہوئے بتایا گیا ہے کہ سرکاری فوج کے ہاتھوں دوما میں گولیاں مار کر 44 افراد کو شہید کر دیا گیا ہے۔ مارے جانے والوں میں بچے، عورتیں اور معمر شہری
بھی شامل ہیں۔

دوما قتل عام کی ایک ویڈیو ‘‘العربیہ’’ کو بھی موصول ہوئی ہے۔ ویڈیو سے یہ معلوم نہیں ہو پا رہا ہے کہ قتل عام میں کون ملوث ہے اور نہ ہی کسی فریق نے اس کی ذمہ داری قبول کی ہے۔ تاہم باغیوں نے دوما میں ہوئے قتل عام کی ذمہ داری سرکاری فوج پر عائد کی ہے اور اسے بشار الاسد کے انسانیت کے خلاف مظالم کا تسلسل قرار دیا ہے۔

قبل ازیں شام میں جنرل انقلاب کونسل کی جانب سے بتایا گیا تھا کہ شام کے شہر دوما میں سرکاری فوج نے ھاون راکٹوں اور ٹینکوں سے راکٹ باری شروع کر رکھی ہے جس کی وجہ سے دوما کے شہری گھروں میں محصور ہو کر رہ گئے ہیں۔ گولہ باری سے درجنوں افراد مارے گئے اور سینکڑوں زخمی ہیں اور بڑی مقدار میں ادویات اور خوراک کو نذر آتش کر دیا گیا ہے۔

ادھر شام میڈیا سینٹر کے مطابق حماۃ شہر میں 30 فوجی بغاوت کے بعد فری آرمی میں شامل ہو گئے۔ حماۃ میں گذشتہ چند روز سے جاری گھمسان کی لڑائی میں کم سے کم ایک سو بیس افراد مارے جا چکے ہیں۔ مہلوکین میں بیشتر عام شہری، خواتین اور بچے شامل ہیں۔