جيزال خوري: مساء الخير، يعيش لبنان أياماً مضطربة سياسياً بعد اغتيال الرئيس رفيق الحريري من تصعيد للمعارضة بإطلاق انتفاضة الاستقلال, وردّ الموالاة باعتبار أن هذا الموقف انقلاب على الحكومة, غداً الاثنين ستعم مظاهرات شعبية واعتصامات في مكان الجريمة, أما ساحة النجمة حيث البرلمان اللبناني ستشهد مواجهة سلمية بين نواب المعارضة والموالاة. برنامج بالعربي الليلة يستضيف السيدة نائلة معوض نائب في البرلمان اللبناني وعضو في قرنة شهوان المعارض والتي عاشت تجربة الاغتيال سياسي بعد اغتيال زوجها الرئيس اللبناني المنتخب سنة 89 في يوم عيد الاستقلال, بدايةً تقرير إعداد جوانا نصار. التعليق الصوتي: كمال جنبلاط، طوني سليمان فرنجية، بشير الجميل، رشيد كرامي، حسن خالد، رينيه معوّض، داني شمعون، رفيق الحريري، أسماء كبيرة في تاريخ لبنان السياسي منذ الحرب مصيرها واحداً الاغتيال, دوامة الاغتيالات السياسية في لبنان لم تتوقف بين مشهد 14 شباط 2005 ومشهد 22 تشرين الثاني 1989 تكاد الصورة أن تكون متطابقة, فمثلما حمل رينيه معوض آمال المصالحة الوطنية في الطائف جاءت مواقف الحريري وهو الذي بنى الفندق والذي احتضن مؤتمر الطائف, أن إرادة اللبنانيين واحدة ومعركتهم واحدة في استعادة الوطن الحلم, ومثل ما جسّد رينيه معوّض الاعتدال السياسي ودعا إلى التوافق بين اللبنانيين, جاءت إرادة رفيق الحريري على البقاء على مسافة واحدة من كافة اللبنانيين في بلد كثُرت فيه الانقسامات, ومثل ما كان اغتيال رينيه معوّض ضربة قاسية للوطن جاء اغتيال الحريري طعنة في قلب لبنان, هل الحقيقة أفظع من أن تُكشف وتُعلن؟ هل سيذهب دم الحريري ورفاقه هدراً كما ذهب دم معوض وباقي الشهداء؟ أم هل تظاهرة المليون تؤكد العكس؟ هل سيغرق لبنان ويصبح اللبنانيون رهينة للترهيب؟ سيكون استشهاد الحريري قيامة لوطن جديد.

اغتيال الحريري شبيه باغتيال معوض

جيزال خوري: ست نايلة الحقيقة هو صعب الواحد يرجع يتذكر كل الأيام خاصة أنو أنتِ شخصياً يعني تضايقتي بهذا الموضوع، ويعني خلينا نقول انجرحتي مثلما اليوم عائلة آل الحريري يعني مجروحة في الصميم, بدي أعيدك شوي لنرجع لـ22 تشرين الثاني عام 1989، وين كنتِ؟ وكيف تلقيتِ الخير؟ نائله رينيه معوض: أولاً بدي أؤكد لك أنه اغتيال الرئيس الحريري عيشني من جديد يعني صار لي جمعة عايشه بـ.. من 15 سنة كيف سمعت الانفجار ووقت سمعته كنا بالمجلس النيابي فتت عند الرئيس الحريري قلت له الرفيق الحريري..جيزال خوري: بتقصدي على الرئيس بري.نائله رينيه معوض: بري.. وقلت له الرئيس الحريري قتل لأنه ذات القصة ذات القصة يلي حصلت مع رينيه.جيزال خوري: إيه بس كيف عرفتِ إنو يعني الرئيس رفيق الحريري لأنه كان بالجلسة يعني..نائله رينيه معوض: كان بالجلسة راح ودغري قالوا فيه موكب رسمي, قالوا يعني بعد 10 دقائق ربع ساعة..جيزال خوري: أنتِ وين كنتِ وقت صار انفجار اغتيال الرئيس معوض؟ نائله رينيه معوض: أنا كنت بالطابق الأخير يلّي سمّوه بعدين المقرّ المؤقت وعم أقول الطابق الأخير لأنه الطابق العادي كان قبل الأخير, وكان فيه الطابق الأخير هيك صالون صغير مع اوضتين نوم, وكنت مع السفير الألماني يلي أجى يعرض خدمات ألمانيا مع الرئيس الجديد, وشو بيقدروا يعملوا ليساعدوا لبنان..جيزال خوري: لازم نقول بين هلالين أو سخرية القدر أنو مقرّ الرئاسة المؤقت وقتها للرئيس معوّض هو مكتب شركة الرئيس رفيق الحريري..نائله رينيه معوض: مظبوط.جيزال خوري: وجاره والسيارة اللي تفجرّت ويعني قتلت الرئيس معوض هي السيارة هدية الرئيس رفيق الحريري..نائله رينيه معوض: حطها بتصرف..جيزال خوري: حطها بتصرف الرئيس رينيه معوض..نائله رينيه معوض: مظبوط. جيزال خوري: أنتِ سمعتِ الانفجار من اوجيرو؟ نائله رينيه معوض: إيه شفته يعني شفت الدخنة وشفت كل شي لأنو كان إذا بدك..جيزال خوري: مقرّ الحكومة. نائله رينيه معوض: قريب إذا بتطلّعي قريب, وشفت دخان عم يطلع ودغري ركضت إنّو وأكدوا لي بعدين من مقرّ اللي صفّى بعدين وزارة الداخلية كان آنذاك مقر رئاسة الوزارة, قالوا لي: لأ ترك الرئيس وما تخافي، وصفينا ما أجى على البيت دغري مرق على الرئيس حسيني لأ زمط، لأ ما زمط بعد ساعتين تالحقيقة تأكّدت..جيزال خوري: مين خبّرك؟ نائله رينيه معوض: ما حدا بس ما حدا قلي شي بس وأنا بعرف رينيه كان المفروض يتلفن لي يطمّني يعني كانت واضحة. جيزال خوري: شو أول شي مرّ على رأسك، يعني خلينا نقول مين اتهمتِ أول شيء؟
نائله رينيه معوض: بدي أقولك شغلة أولاً ما كنت ما كان بذهني مين بدّي اتهم، أولاً كان بدي طمّن ولادي ما يتفاجؤوا، تلفنت على الحارك قلتلهم بيّكم مجروح كتير وبفضّل إذا تجوا وتبقوا معه بالمستشفى أولاً, ثانياً كان عندي هاجس واحد إنو رينيه عطى حياته للوطن, رينيه رفض الفراغ الدستوري, إجو لعندي الرئيس الحسيني والرئيس الحص قلتل لهم ما تبقوا معي اركضوا ودغري انتخبوا رئيساً جديداً لأنه الخراب نهائي على لبنان إذا فيه فراغ دستوري, وقتها ما اتهمت لأنه ما تنسي أنه كان وقت اللي رينيه استلم لما وصل لسدة الرئاسة كان لبنان بعده مقسوم, وكان فيه أكثر من فئة عندها امتداد أمني بالبلد، وكان فيه أكثر من فريق إلهم مصلحة ما يطبّق لما اتفاق الطائف اللي أظهر يلي كرّس وأسس لاستئناف حوار لبناني لبناني تحت رعاية عربية ودولية ننتبه لهالموضوع تاركين أنّو المصلحة يخربطوهن. جيزال خوري: نعم يعني صار في اتهامات كتير وقتها صار فيه اتهام للعماد ميشال عون, للعراقيين اللي كانوا مساندينو ولمنظمة التحرير الفلسطينية.. أنتِ شعورك لوين راح يعني أو معلوماتك أو الشائعات لأنو بس ليفهموا يعني المشاهدين العرب يلي طبعاً ما عاشوا هذه المرحلة إنّو قبل اغتيال الرئيس رينيه معوّض كان فيه شائعات في البلد..نائله رينيه معوض: مظبوط.جيزال خوري: شائعات بتقول أنو سيُغتال رئيس الجمهورية رينيه معوّض وبشكل مكثف يعني..نائله رينيه معوض: مظبوط, وأجانا كتير تهديدات. جيزال خوري: كيف كانت تجي التهديدات؟
نائله رينيه معوض: أولاً تجي مثلاً أجا تهديد متل نوع من إخبارية من أصدقاء بالحزب الشيوعي اللبناني إنّو إحدى منتسبي الحزب الشيوعي أخوه عسكري وطُلب منه أنو يحطّ متفجرة بسيارة الرئيس يلي كانت موقّفه قدّام الباب..جيزال خوري: قبل يومين. نائله رينيه معوض: قبل شي 5, 6 أيام من..جيزال خوري: نعم وصار فيه تحقيق مع هذا الرائد. نائله رينيه معوض: إيه كله اختفى. جيزال خوري: وكتبت إنّو يعني الكتاب اللي عامله بفتكر أكيد بتعرفيه طنوس معوّض..نائله رينيه معوض: ولَوْ طبعاً بعرفه..جيزال خوري: اللي هو خلينا نقول من جماعتكم يعني يقول إنو كان مع الرئيس..نائله رينيه معوض: كان مع الرئيس..جيزال خوري: إنو الرئيس يعني حقق شخصياً مع هذا الرائد اللي وقتها اتُهم بأنه على علاقة مع العماد عون وثبتت إنو هالقصة هي يعني اختلاق عريف, أنتِ اقتنعتي بهالرواية؟نائله رينيه معوض: بتعرفي بالأول رح تلاقي غريب مثل ما قلت لك أولاً كان هاجسي إنو ما يكون فيه فراغ دستوري, ثاني شي كان هاجسي إنو ما يكون في أي ردة فعل من العيلة السياسية إذا بدك العيلة الكبيرة بلا طعمة مثل ما شفنا بعض ردات فعل يلي راحوا فيها أبرياء وأنا كنت رافضتها..جيزال خوري: بعد مقتل كمال جنبلاط بالذات.. نائله رينيه معوض: وبعد مقتل بشير الجميل..جيزال خوري: وبعد مقتل بشير جميل..نائله رينيه معوض: بعد مقتل طوني فرنجية بعد مقتل كل هالشخصيات, وشيء بينفهم أصبح لأني عشت الاغتيالات السابقة قلت أوعى ما بدنا نخلي أي بريء ما بدي نقطة دم منكون عم نحجّم استشهاد رينية ثانياً..جيزال خوري: نعم. نائله رينيه معوض: ثالثاً طبعاً بلّشت أطالب وأبعث رسائل لرئيس الجمهورية إلياس الهراوي وبعتت رسالة للرئيس سليم الحص إنو دخليكم قوموا بهالتحقيق، وإذا ما فيه خبراء لأن المادة المتفجرة يلي استُعملت يومها كانت فريدة من نوعها, عملت متل نوع من ليزر واللي داخل هالليزر كله راح, ويلي خارج هالليزر ما صابه شي أبداً, فيه شي فظيع فيها..جيزال خوري: أنا بعرف إنو كان في متفجرة حدّ حيط مدرسة اللي هو فجّر يعني السيارة، بس ما فهمت كيف بالليزر يعني. نائله رينيه معوض: يعني متل الليزر معناته فيه تفجرت السيارة وفجرت السيارة تبعنا يلي وراها واستشهدوا فيها رفاق الرئيس معوض, طبعاً يلي استشهد معه بالسيارة هو المرافق الكولونيل رميه بس بالسيارة الرانج روفر يلي وراء سيارة الرئيس استشهدوا 6 شباب.. 5 شباب السادس فاتح صندوق السيارة ما أصابه شي، وهيدا كان موضع استغراب كثير من الخبراء من الأخصائيين واعتبروا إنّو بلبنان ما فيه أي إنسان خارج ما عارف كفاية بالمتفجرات تيعرف يكشف هالنوعية الجديدة جداً والمتقدمة جداً من المتفجرات, أصبح بعتت رسالة للرئيس إلياس الهراوي وبعتت رسالة للرئيس سليم الحص إنو ابعتوا جيبوا خبراء من الخارج أنا بتكفل بكل التكاليف..جيزال خوري: نعم. نائله رينيه معوض: بس ابعتوا جيبوهم. جيزال خوري: شو صار؟
نائله رينيه معوض: ما شي, تاني شي سيارة المرسيدس يلي استشهد فيها الرئيس تفتتت ووقتها كمان كان شيء جديد يعني تفتتت كلها سوا كمان شركة مرسيدس كانت متمنية تعرف شو هيي هالنوعية المتفجرة يلي بتفتت سيارة مصفحة, أصبح حتى ما ندخل بكتير من التفاصيل بقدر أؤكد شغله إنو الدولة أن السلطة آنذاك تعاطت بملف رينيه معوّض بمنتهى الاستهتار, وبمنتهى اللاأخلاقية مثلاً بـ.. حطوا بقايا السيارتين وكان بعدو الموتور صاغ يعني حطوهم بسكنة الحلو اختفوا من هونيك, اختفى كتير من الأدلة يلّي كانت ممكن تساعد بالتحقيق, ووقت يلي شفت بعد محاولة اغتيال الوزير مروان حمادة وكنت تمنيت أنّو بهالفيلم لأنو اليوم مروان حمادة الشهيد الحي, بس مروان حمادة نجا بأعجوبة نجا على برمة الدولاب يعني مفروض مروان حمادة ما يكون معنا اليوم لا سمح الله, أصبح وقت اللي عم شوف كيف عم يخفوا كل دلائل الاغتيال عم بتذكر من 15 سنة أخفوا كل دلائل اغتيال الرئيس معوض وما كان فيه أي جدية بموضوعه. جيزال خوري: ليش ما طالبتِ بتحقيق دولي ما هذا رئيس جمهورية بالنهاية؟ نائله رينيه معوض: بدّي أقول لك شغله أنا اعتبرت يوميتها إذا أنا بدي طالب بكل شي أما أنا أرفع دعوى بهالموضوع بصفّي عم حجّم استشهاد رينيه معوض, رينيه معوض استشهد رئيس جمهورية, رينيه معوض المسؤول عنه كانت السلطة اللبنانية يلّي هيّ مفروض تحقق عن اغتيال رئيس جمهورية, يلي كمان كان حق الشعب اللبناني ككل مش بس أنا أو أولادي، ما اغتيل رينيه معوض لأنه زوجي ما اغتيل رينيه معوض لأنه بيّ أولادي اغتيل لأنه رئيس جمهورية حامل مشروع مصالحة وطنية كان يجسّدها الحقيقة بكل مساره السياسي, بأطباعه وبقناعاتة برفضه للميليشيات برفضه لامتيازات الميليشيات, وبتاريخه السياسي اغتيل رينيه معوض يلي انتُخب بعد لقاء الطائف, يلي أرسى وأسس لأكثر من موضوع. هون بدّي أوضح شغلات ممكن عم تخفى.. عم تخفى عن ذهن اللبنانيين, اتفاق الطائف ما نظّم بقاء سوري بلبنان نظّم الخروج السوري المشرّف من لبنان. جيزال خوري: بعد الانسحاب الإسرائيلي..نائله رينيه معوض: لأ أبداً ما انحكى ما انربط بهالموضوع أبداً‌، بالعكس تقلّك شغله الوفاق الوطني بلبنان يلي كان بده يبتدي بمصالحة وطنية وهون اختيار شخص رينيه معوض كان مهماً، لأنه هو بالفعل وقالها بخطاب القسم, قال: أنا كل حياتي جسّدت الوفاق الوطني والمصالحة الوطنية, وحافظت على علاقات مع كل الأطراف على الساحة اللبنانية. جيزال خوري: شو قصدك تقولي لنا هل إنو الانسحاب السوري هو يلي قتل رينيه معوض؟نائله رينيه معوض: لأ جيزال خوري: يعني هذا البند في الطائف اللي قتل رينيه معوض؟ أو ماذا يعني نحنا إذا منشوف آخر أسبوع بهذا الكتاب كيف عاش الرئيس معوض؟ عاش قريب من السوريين قريب من السعوديين, يعني كان فيه اتصال يومي بالملك فهد. نائله رينيه معوض: طبعاً لأنو كان الملك فهد أرسل له السفير الأخضر الإبراهيمي يلي هو كان مسؤول..جيزال خوري: صحيح. نائله رينيه معوض: حتى يقول له إنو أخذوا قراراً لإعادة إعمار لبنان، خصصوا 7 مليار دولار عم بحكيكي بالـ 89، وإنو أي موضوع بينقص الملك فهد بيتكلّف شخصياً ومن صندوقه الخاص بتكملة المبالغ الضرورية لإعادة بناء لبنان..جيزال خوري: طيب ست نائلة شو مسؤولية السوريين بعدم وجود تحقيق دولي؟ هل طلبتِ منن؟
نائله رينيه معوض: أنا طلبت تحقيق حتى نبلّش بالتحقيق بلبنان ما حدن حقق بطريقة جدية, طالبت بخبراء وقتها ما.. ما جابوهم, وبؤكّد لك أنا قلتلهم إنو بدي أنا بدفع التكاليف أصبح وقت يلي بشوف الطريقة يلّي السوريين ساعدوا السلطة اللبنانية وما بدي قول ساعدوا, يعني هنن بالنتيجة وجهين لفرد عملة الاستهتار يلي لفلفوا فيها التحقيق بتخليني فكر إنو فيه مسؤولية جدية..جيزال خوري: طيب إذا بتسمحي خلينا نتوقّف مع الإعلان ومنرجع نحكي عن هذه المسؤولية. [فاصل إعلاني]

مسؤولية السوريين باغتيال رينيه معوض

	ما في شك إنو السلطة اللبنانية بعد اغتيال رينيه معوض أولاً بمساعدة وتغطية من السلطة السورية لفلفت كل الدلائل والعناصر يلي كان ممكن تخلينا نتقدم بالتحقيق

جيزال خوري: نعود إلى برنامج بالعربي وحوارنا هو مع السيدة نائلة رينيه معوض, ست نائلة يعني كنتِ عم تحكي عن المسؤولية بالتحقيق اللي حملتيها للسوريين..نائله رينيه معوض: إيه. جيزال خوري: بس خليني قول اليوم خاصة المعارضة عم تزجّ اسم اغتيال الرئيس رينيه معوض وتحمّل المسؤولية لسورية, مع أنو بوقتها الجو ما كان هيك، يعني الشيوعيين جورج حاوي حذره من ميشيل عون، ميشال المرّ حذره من ميشال عون..نائله رينيه معوض: لأ ما بفتكر ميشال..جيزال خوري: يعني هيدا موجود بالكتاب..نائله رينيه معوض: تأقلّك شغله خلينا ندخل..جيزال خوري: ليش.. ليش شو رأيك بتحميل المسؤولية؟
نائله رينيه معوض: تقلّك شغلة ما ندخل بتفاصيل منقدر ندخل ونحكي من هلأ لبعد بكره. فيه 3 شغلات أولاً عم قلّك وقت وصول رينيه معوض على سدة الرئاسة كان في أكتر من جهة أمنية عندها امتدادات بلبنان, تاني شيء ما في شك إنو السلطة اللبنانية بعد اغتيال رينيه معوض أولاً بمساعدة وتغطية من السلطة السورية لفلفت كل الدلائل والعناصر يلي كان ممكن تخلينا نتقدم بالتحقيق, تانياً وأهم قلتلك عن قضية الطائف لأنو بالنتيجة رينيه معوض كان يجسّد هالمصالحة الوطنية، وكان يجسّد إذا كان بدك روحية اتفاق الطائف.. منيح وقت يلي بالنتيجة بشوف إنو بتهم أنا مباشرة سورية باغتيال مسار الطائف لأنه خلقت سلطة مخابراتية قمعية أمنية يلّي هي اغتالت مسار الطائف, وبدل ما يكون فيه هناك مصالحة وطنية عززوا الانقسامات بين اللبنانيين, منعوا التواصل بين اللبنانيين, منعوا المصالحة بين اللبنانيين وجعلوا من لبنان بلداً ممسوكاً بدل ما يكون متماسكاً..جيزال خوري: شو يعني عم تتهمي مباشرة سورية باغتيال رينيه معوض..نائله رينيه معوض: لأ عم بتهم سورية بضرب مسار الطائف أولاً..جيزال خوري: بس..نائله رينيه معوض: خليني كمّلّك..جيزال خوري: إيه. نائله رينيه معوض: تاني شي ومش بس إنو تناقضت المصالحة الوطنية بس أقاموا نظاماً بوليسياً مخابراتياً عم تديره عن جدّ. جيزال خوري: إنو رينيه معوض ما كان ترك هالشي؟ نائله رينيه معوض: أكيد لأ. تانياً أكيد لأ.. أؤكّد لك لأ..جيزال خوري: ما كان يكون..نائله رينيه معوض: تانياً بدنا نرجع شو كان مطلوب من الطائف؟ لأنه إذا ما فهمنا شو كان مطلوباً من الطائف ما منفهم اغتيال رينيه معوض, مطلوب كان من الطائف.. بيئة بيئة اتفاقية الطائف كان مطلوب انسحاب الجيوش السورية من لبنان بطريقة مشرّفة, وكان مطلوب إنو الاتفاق اللبناني اللبناني يلي تسبقه المصالحة الوطنية هي تؤمن الاستقرار بلبنان هي بتحمي هذا الاستقرار هيّ بتحمي الموقع العربي للبنان، وهيّ بتحمي العلاقة اللبنانية السورية المبنية على شراكة..جيزال خوري: يعني الجيش اللبناني..نائله رينيه معوض: طوعية ومستمرة ومتوازنة مع سورية..جيزال خوري: عم تقولي الجيش اللبناني يعني بمعنى آخر أنّو الجيش اللبناني كان سيحل محل الجيش السوري يلّي موجود في لبنان..نائله رينيه معوض: 100%. جيزال خوري: لحماية الطائف بس هذا الجيش ما كان موجوداً ست نايلة كان فيه ميشال عون, كان في ظاهرة في بعبدة موجودة كان اسمها ميشال عون..نائله رينيه معوض: كان الرئيس معوض تأكد إنو هوّ ويلي عززه بهالثقة إنّو فيه كتير من الضباط يلي كانوا مع العماد ميشال عون أجوا لعندو وقالوا له نحنا ما زال فيه أنت على الرأس الدولة نحنا إلنا ثقة فيك, ونحنا رح نكون معك ببناء الجيش الوطني, وكتار وما بدي هلأ سميهم لأنه البعض أنا بعرفهم اتصلوا فيي أنا حتى وصّل الخبر لرينيه, ووقتها كان دايماً يقول لي رينيه ينتظروا حتى أنا عيّن قائد للجيش بيروحوا وبيلتحقوا بقائد الجيش..جيزال خوري: بس هو اللي عين إيميل لحود..نائله رينيه معوض: مظبوط هو اللي عيّن إيميل لحود..جيزال خوري: قائد.. قائد للجيش نعم. نائله رينيه معوض: ومن أسباب الاختيار كان إنو العماد إيميل لحود ما ارتبط بأي عمل عنف، أما بأي مليشيا أما بأي يعني ممكن يزعزع ثقة هالجيش و..جيزال خوري: نعم وبعد وفاة الرئيس رينيه معوض صرتي يعني..نائله رينيه معوض: بعد استشهاده.

كيف تحولت نائلة رينيه معوض إلى السياسة؟

جيزال خوري: بعد استشهاده صرتِ خلينا نقول قطب سياسي، يعني كيف تحوّلت نائلة معوض إلى سياسي إلى نائب؟ زرتِ دمشق؟ نائله رينيه معوض: بعد الـ 40 رحت زرت دمشق, وبس بشكل طبيعي فور الاستشهاد شعرت أنا بقول دايماً.. بقول إنو فيه عسكري بيركض على ساحة المعركة ساعة الاقتتال بيكون حامل العلم بيركض بيوقع تحت رصاص العدو, يلي وراه دغري بيستلم العلم وبكمّل, وهيك أنا تصرّفت وما فكرت تكّة كيف؟ وشو؟ وليش؟ وهل أنا قادرة؟ هل أنا منّي قادرة؟ وبعد 3 أو 4 أيام من استشهاد الرئيس معوض اجتمعوا شي 4 آلاف شخص من العيلة, ويعني العيلة السياسية، وطلبوا مني تكملة المسيرة, وكان عندي هالمسيرة صفّت قضيتي.جيزال خوري: مثل هلأ عم بيصير مع ابنه للرئيس رفيق الحريري بهاء, أنه فيه نوع من المبايعة, شو يعني شو بتنصحيها للسيدة نازك الحريري اللي اليوم عم بتعيش اللي أنت عشتيه من 15 سنة؟نائلة رينيه معوض: أنا شفتها مبارح على الضريح, وشفتها إنها قوية, ونحنا المهم إنّو يبقى هالبيت مفتوح, يبقى بيت الرئيس رفيق الحريري بيت بالفعل رفيق الحريري المسؤول, رفيق الحريري المعارض رفيق الحريري..جيزال خوري: نعم.. أنتِ ما كنتِ كتير أصحاب مع يعني الرئيس رفيق الحريري. نائلة رينيه معوض: لأ كنت بالمعارضة. جيزال خوري: يعني كنتِ بالمعارضة أيام ما كان هو بالحكومة، كان حليفك عمر كرامي.نائلة رينيه معوض: نعم، نعم.. بس بدي أقولك شغله..جيزال خوري: شو بتردي عليه لحليفك يعني الرئيس عمر كرامي اللي اعتبركم اليوم عم تعملوا انقلاب. نائلة رينيه معوض: بدي أقولك شغله أولاً تنرجع للرئيس الحريري نحنا كنا بالمعارضة عارضناه بالسياسية وبطريقة ديمقراطية, وبكل احترام وبكل محبة, وبالتالي نحنا بالأخير وأنا أكدت من أول ثانية أنّو يلّي اغتيل هو الرئيس الحريري المعارض, هو الرئيس الحريري يلّي أعطى ضخامة وعزيمة لهالمعارضة المتعددة, والرئيس الحريري يلّي كنا بدنا نخوض مع بعضنا مش بس الانتخابات بس كنا بدنا نخوض معركة استعادة لبنان استقلاله وسيادته وقراره.جيزال خوري: شفتيه أنتِ بالأيام الأخيرة. نائلة رينيه معوض: ما شفته بس كنا على اتصال دائم إذا بدك مع بعضنا عبر أصدقاء, وكان واضحاً جداً وقت اللي أجو على البريستول ليس فقط..جيزال خوري: من كتلة بيروت.. نائلة رينيه معوض: إيه, إجى وخصوصاً أجى باسل فليحان يعني واليوم إن شاء الله ما يكون الوجه الأخير بالفيلم اللي أعدته زميلتكم..جيزال خوري: فيه معلومات عن باسل فليحان؟ نائلة رينيه معوض: كتير صحته عاطلة، والأمل ضئيل جداً, واليوم كلنا كنا عم نصلّي مع بعضنا بكنيسة الوردية بدعوى من أصدقائه من النائب غطاس خوري تا الله يشفيه ويعطيه يعني يعمل أعجوبة ويقدر يبقى بيناتنا.جيزال خوري: نعم، ست نائلة كنت سألتك عن يعني حليفك الرئيس عمر كرامي اللي اليوم يعني يعني وجّه خلينا نقول من يومين وجه كلام قاسي للمعارضة, وقال: هيدا يعني عم تعملوها هيدي استراتيجية لانقلاب هيدا مش مظاهرات. نائلة رينيه معوض: بدك الصراحة بفضّل ما أدخل بهالموضوع, لأن أنا أساساً بعتبر إنّو الرئيس عمر كرامي بالوقت الحاضر هو آخر من يعلم بيلي عم يحصل، وآخر من.. ومن سوء الحظ عم يُستعمل تا يغطي أمور منّه طبيعية وأدت إلى استشهاد الرئيس الحريري, ومش بس هوّه، اليوم أنا بحمّل هالسلطة بالذات مسؤولية باغتيال الرئيس الحريري, أولاً أجا اغتياله بخضمّ اتهامات فظيعة يعني..جيزال خوري: رأس الأفعى.نائلة رينيه معوض: رأس الأفعى نحنا بوديغارديه، إذاً الرئيس الحريري بده ينضم للمعارضة المسيحية, السلطة ما رح تبقى عم تتفرّج, السلطة رح تقلب من سلطة إلى دفاع عن الخط, وبتنقلب الطاولة وما رح نكون مبسوطين..جيزال خوري: بس الوزير فرنجية عم بيقول طيب صحيح نحنا عارضناه للرئيس الحريري كمان يعني مثل ما قلتي بس هيدا كمان كان سياسياً يعني قصة الذات ورأس الأفعى وهيدا كان كمان كلاماً سياسياً..

على الحكومة اللبنانية أن تستقيل

نائلة رينيه معوض: لأ ما.. بفتكر جيزال بدنا نكون أدق من هيك، اعترف إنو فيه مسؤولية سياسية لأنه فيه تقصير بيلّي حصل أولاً, بعدين وقت اللي وزير داخلية بيعترف إنّو فيه تقصير أمام مسؤولية سياسية أول شيء بينعمل بهالوزارة الكريمة بتستقيل يعني بتقدم استقالتها, فيه شي فظيع حصل فيه زلزال حصل بلبنان وبعدنا عم نتحدث كأن ما فيه شي, بعدين بدّي قلّك شغله..جيزال خوري: شو بتفهمي من كلام الوزير فرنجية هاليومين؟ نائلة رينيه معوض: خلّيني أقولك بس كملك الموضوع، بتفهمي بالقانون على كل حال كلنا نحنا تعلّمنا بالقانون إنّو فيه ما يسمى الفاعل الذهني، وهيدي كانت من إحدى اتهامات اتهموا فيها اتهمت فيها هالسلطة ذاتها ممكن مش الأشخاص بس السلطة وقت اللي اتهمت الدكتور سمير جعجع بالجرائم يلّي اتُهم فيها قالت إنّو أيضاً من جملة الاتهامات إنّو هو فاعل ذهني لأنه هو خلق..جيزال خوري: جو..نائلة رينيه معوض: الجو يلي سمح أو حمّس أو شرّع أي اغتيال, منيح قبل اغتيال الرئيس الحريري شو بتسمّي هالجو شي بتجي السلطة بتقول أنو إحنا متصهينين, شي بيجي وزير الداخلية بيقول الرئيس الحريري عنده مشروع مشبوه من سنة 94, ضلل السوريين، رأس الأفعى المعاون تبعه وليد جنبلاط نحنا بوديغارديه..جيزال خوري: طيب خلينا نشوف الوضع الحالي.. نائلة رينيه معوض: ما هيدا الوضع الحالي..جيزال خوري: نحكي شوي عن بكرة..نائلة رينيه معوض: أصبح صار فيه أنا أيضاً بحمّل مسؤولية قانونية لهذه السلطة ولهذه الحكومة.جيزال خوري: شو يعني قانونية رح تقدموا دعوى يعني للمحاكم الدولية؟نائلة رينيه معوض: ليش تا بدّها السلطة.. يا جيزال ليش تا بدّها السلطة على كل حال ما إلنا ثقة إنو هيك سلطة ممكن تقوم بتحقيق نزيه أما بتحقيق فعلي, نحن عم نطالب وعم نطلب بلجنة تحقيق دولية..جيزال خوري: هيدا يلي قلتيه للأخضر الإبراهيمي نائلة رينيه معوض: تحت إشراف..جيزال خوري: اللي هو صديقكم وصديق..نائلة رينيه معوض: طبعاً طبعاً طلبناها من.. وبعدين صرحنا بكل وضوح بهالموضوع..جيزال خوري: يعني بعث كوفي أنان محققاً أيرلندياً, شو قادر يعمل هذا المحقق الأيرلندي؟ نائلة رينيه معوض: لأ نحنا ما منكتفي بالمحقق الأيرلندي نحنا بدنا لجنة تحقيق دولية بكل معنى الكلمة, إلها أصولها القانونية, إلها صلاحياتها, إلها قدراتها, وهذه اللي عم منطالب فيها.جيزال خوري: هيدا سمّعتيه للأخضر الإبراهيمي, هو شو قال لكم؟ شو قال لك نائلة معوض صديقة.. يعني الرئيس رينيه معوض اللي كان صديقه؟ نائلة رينيه معوض: أولاً ثابت إنو أنا بالمأتم كنت حدّو..جيزال خوري: نعم. نائلة رينيه معوض: ثانياً إجى لحقنا لأ.. ماكان لأنو ما عم يقدر يطلع على قدّ ما كان فيه..جيزال خوري: مليون زلمه. نائلة رينيه معوض: وفوق وما فوق وعلى كل حال هالمشهد يلّي شفناه يوم المأتم, مأتم الرئيس رفيق الحريري بيؤكد إنو حاج بقا يقولولنا أنو فيه خلاف بين اللبنانيين خلاف طائفي بين اللبنانيين..جيزال خوري: هيدا بنرجع له على آخر بند. نائلة رينيه معوض: بدنا نرجعه له.

لقاء المعارضة مع الأخضر الإبراهيمي

جيزال خوري: بس شو سمّعكم الأخضر شو قال الأخضر الإبراهيمي؟ نائلة رينيه معوض: قال بكتير من الدقة لأن أجا قلتلّه تعال إحنا بالنهار خذ فنجان قهوة معنا، وبعدين رح تقدر تروح محل ما بدك, أجى وكنا شي 12 واحد عملنا اجتماعاً طبعاً غير رسمي, وهو قال: أنا بدي أتسمّع لأنه منّو هونه تا يسلمني ولا لإلي ولا لغيري رسالة, هو أجى ممثل للرئيس كوفي أنان للأمين العام للأمم المتحدة كوفي أنان وهو أصلاً كان جاي بصفته الشخصية وبتعرفيه قدّيشو دقيق السفير الأخضر الإبراهيمي..جيزال خوري: نعم. نائلة رينيه معوض: قال لنا أنا ما إلي حق أعطيكم أي رأي لأنه أنا هون بمهمة كتير محددة, أنا رح أنقل رغباتكم لكوفي أنان للأمين العام..جيزال خوري: طيب..نائلة رينيه معوض: الأمم المتحدة. جيزال خوري: فيه صديق تاني هو أمين عام الجامعة العربية, أجى على المأتم وراح يشوف الرئيس إيميل لحود هل التقيتيه فيه لعمرو موسى؟ نائلة رينيه معوض: نعم رحت عملت له زيارة..جيزال خوري: شو سمعتي وشو سمّعتيه؟نائلة رينيه معوض: وصديق لإلي, بتعرفي كمان هو بيجي أجى بيمثّل أجى بصفته أميناً عاماً.. جيزال خوري: للجامعة العربية. نائلة رينيه معوض: للجامعة العربية، بدّي أقول لك شغلة فيه موضوع واضح بالنسبة للعرب وبالنسبة للأسرة الدولية, الطائف ما كان بموضوع السيادة, ما كان اتفاقاً لبنانياً سورياً كان اتفاقاً لبنانياً لبنانياً برعاية عربية, وبتغطية دولية. بعد استشهاد رينيه معوض بطلّت الرعاية الدولية بطلّت تغطية..جيزال خوري: الرعاية العربية.
نائلة رينيه معوض: وبطلّت.. واليوم فيه وطن اسمه لبنان أصبح وطناً أسيراً, فيه شعب اسمه الشعب اللبناني شعب معتّر, واستعادة هذا الشعب استقلاله وسيادته وقراره الحر هو أساسي بهالعالم العربي, وأساسي لمصداقية الشرعية الدولية يلّي هي أجت قبل 1559 باتفاق الطائف, غطّت وضمنت ووضعت حالة ضمانة لاتفاق الطائف، وين هنن وهيدي يلي قلناها للأخضر الإبراهيمي, وهيدي اللي قلناها لعمرو موسى مع حفظ الألقاب, وهيدي يلّي طلبنا منن إنو.. حملّناهم رسالة منّا بهالموضوع.

رمز المعارضة وشعارها

جيزال خوري: نعم قبل ما أعطي الكلمة للإعلان, حاطة يعني لونين على ثيابك أحمر وأبيض هل سيكون هيدا رمز المعارضة اللبنانية؟ شو يعني؟نائلة رينيه معوض: نعم. هيدا رمز المعارضة اللبنانية أولاً طبعاً فيه ألوان العلم اللبناني، فيه الدم الشهادة التضحية, فيه الرجاء والطهارة, هيدا رح يكون اللوجو للمعارضة اللبنانية.جيزال خوري: 2005 الاستقلال كلنا للوطن.نائلة رينيه معوض: 2005 الاستقلال كلنا للوطن..جيزال خوري: يعني بكرة رح نشوف هيك على الطرقات؟ نائلة رينيه معوض: أكيد أكيد..جيزال خوري: هيدا شعار المعارضة؟ نائلة رينيه معوض: هيدا شعار المعارضة, هيدا رمزية المعارضة, وأكتر.. وأكتر رح نوزّع لكل هالأشخاص يلي عم يجوا مش بس عم يجو ما حداً عم بيقلهن يجو, الناس كلها رايده تعبّر أولاً الغضب يلّي شعرت فيه بعد استشهاد الرئيس الحريري بوقت ليه؟ بوقت فيه عم بيؤكدوا لنا إنّو فيه استقرار, وأنو الوجود السوري هو ضامن لهذا الاستقرار, إنو هالجيش اللبناني يلي عم بيكلّفنا مليارات كل سنة هو الجيش الوطني يلي عم يؤمّن الاستقرار, عم يؤكدوا لنا إنو فيه حوار وفيه محاولات للحوار وين؟جيزال خوري: إذا بتسمحي خلينا نتوقف لنحكي عن الحوار يعني يد الموالاة اللي امتدت للمعارضة خلال هاليومين. نائلة رينيه معوض: آخر رمز لهاللونين..جيزال خوري: نعم. نائلة رينيه معوض: هلأ قال لي ياها صديق عزيز لإلي قال لي: معناتها أنو لبنان واحد بس منّه من لون واحد, فيه تعددية بلبنان, ورأيت أيضاً إنّو هالرمزية حلوه كتير.
[فاصل إعلاني]
جيزال خوري: ست نائلة معوض كنا عم نحكي، عم تحكي شوي عن الحوار, فيه يد يعني ممتدة للحوار يعني بدأت مع كلمة السيد حسن نصر الله في عاشوراء, البطرك اليوم موقفه هادئ ويقول أنه يجب على اللبنانيين أن يتحاوروا, عين التينة يعني اجتماع الموالاة حكي حكيوا كمان عن الحوار, بالوقت إنو الوزير جنبلاط يقول أن الحوار هو اغتيال ثانٍ لرفيق الحريري, شو رأيك؟ نائلة رينيه معوض: لأنه أولاً بدنا نعرف هل هي دعوة للحوار..جيزال خوري: من دون شروط . نائلة رينيه معوض: أولاً بدون شروط. جيزال خوري: الرئيس بري قال من دون شروط. نائلة رينيه معوض: منيح نحنا ما عم نوضع شروط, بس معليش نحنا ملوّعين من قضية الحوار, أولاً مَنّا دعوة للحوار، دعوة للتطبيع, لأنه إحنا نعتبر إنو الطريقة يلي تعاملنا فيها بعد اغتيال الرئيس الحريري تقريباً يعني اغتالوه قبل هالدعوة اغتالوه تاني مرة, شو أجو قالوا لنا؟ تفضلوا أنتو كتير عظيم، تعالوا إلكم حق أنتو أنكم تبكوا, إلكم حق تنعوا, إلكم حق تتقبّلوا التعازي, وإلكم حق تنفعلوا بس من الاثنين وطالع رح نرجع على الشغل كأن ما صار شي يعني, فتحنا هلالين اغتيل الرئيس الحريري تقبلنا التعازي عزينا ودعنا تظاهرنا انفعلنا وتفضلوا..جيزال خوري: شو بدكم تعملوا؟نائلة رينيه معوض: خليني بس قلك شغله وين الحوار؟ نحنا وقت يلي ابتدينا من خمس سنوات بقرنة شهوان بالوثيقة التأسيسية لقرنة شهوان كان عنوانها عنوان هذه الوثيقة "من أجل الحوار الوطني" كيف تواجهنا؟ أنا شخصياً خوّنوني بطرابلس, ومين خوّنّي؟ عملاء للسلطة السورية كانوا مقضّايّين شي 10, 15, 20 سنة بالسجون السورية ما أخرجوهم من هالسجون إلا على شرط إنّو هنّن يبقوا وسيلة بين ايديهن, سمّوني أنا غولدا مائير حللوا دمي بطرابلس, جربوا يمنعوني.. جيزال خوري: لأ بس أنت لذكائك.. شبّهوك لذكائك بغولدا مائير. نائلة رينيه معوض: يا ريت إنشاء الله شو بدّك حللوا دمي..جيزال خوري: طيب نائلة رينيه معوض: بس خليني كمّل. جيزال خوري: بس ما عاد عنا كتير وقت. نائلة رينيه معوض: أوكي.. جيزال خوري: اليوم فيه حوار شو بدكم تعملوا المعارضة؟ نائلة رينيه معوض: خليني خليني نشوف..جيزال خوري: نعم. نائلة رينيه معوض: كيف يعني شو حصل شو عم يحصل, عملنا قرنة شهوان شو حصل؟ صار فيه مصالحة الجبل شو حصل؟جيزال خوري: صحيح بـ 7 آب. نائلة رينيه معوض: بـ 7 آب السجن..جيزال خوري: يعني اعتقال الشباب من تيارات المعارضة..نائلة رينيه معوض: من تيارات المعارضة وحطّوا لنا فيلم بيضحّك على.. تذكرنا أيام ستالين والنازية حطّوا إنو توفيق الهندي أنو صحيح كان مطلوباً من ما بعرف أي جهة, تصالحنا مع.. كبّرنا المعارضة شو حصل؟ قلنا لأ للتمديد قلنا لأ للتمديد بطريقة ديمقراطية وحوارية شو حصل؟ محاولة اغتيال مروان حمادة ومثل ما قلنا نجا بأعجوبة, قلنا لأ للوصاية، نعم للاستقلال نعم للسيادة..جيزال خوري: نعم للطائف للرئيس الحريري. نائلة رينيه معوض: نعم للطائف. جيزال خوري: نعم. نائلة رينيه معوض: نعم للقرار اللبناني، للبنانيين يعني مَنّا جريمة بفتكر شو صار؟ اغتالوا رفيق الحريري..جيزال خوري: طيب شو بدكم تعملوا؟ يعني البطرك اليوم عم بيقول إنو المعارضة يمكن ستتحوّل.. يعني بالنهاية سقف المعارضين خاصة في لقاء قرنة شهوان هو البطرك. نائلة رينيه معوض: ما فيه شك بس بدي أقولك شغلة البطرك اليوم مجبور يجرّب يروّق الجو لأن بيعتبر إنّو رسالته الأساسية يلي أصدروها الأربعاء الماضية وبفتكر إذا بتقرئيها ما بتلاقي أنو هالقدّة رايقة.

مشروع المعارضة في المدى المنظور

	اليوم لأول مرة بلبنان فيه شعب لبناني بكل فئاته بكل طوائفه بكل مذاهبه قاعد يداً باليد يصلّي ويعتصم دون عصيان مدني أو أي عمل تخريبي

جيزال خوري: بكره شو رح تعملوا؟ نائلة رينيه معوض: بكره نحنا رافضين بكل وضوح إنو نرجع للشغل بعد جمعة فرصة, وبهالفرصة صار يلي صار, وبكره رح نجي نتحدث بكل برادة حول المادة 63 و68 و73 هل بدنا ياها ولاّ ما بدنا ياها..جيزال خوري: هل صحيح أنكم رح تسكّروا..نائلة رينيه معوض: رافضينها..جيزال خوري: باب المجلس؟نائلة رينيه معوض: تا أقلّك شغلة، نحنا رافضينها وما رح نخلّي هالجلسة تكتمل بهالطريقة, نحنا رايحين رسمياً عند الرئيس بري الساعة 11 أوفدونا 5 نواب من الـ group النيابي الكبير تا نجي نقول للرئيس الحريري.. نحنا بدنا.. للرئيس بري نحنا بدنا انتخابات حاج بقى تقولوا أنو ما بدنا انتخابات, نحنا بدنا انتخابات بدنا نشارك بالانتخابات، وبدنا بالعكس اليوم في جو رفض بالبلد نحنا بيناسبنا مثل ما صار وقتها لغاب المرّ وهالسلطة الكريمة أبطلت له نيابته وسكّرت الـ MTV انتبهي كمان منيح, جايين نقول له بكره يا خيي مو معقول حصل زلزال بالبلد شرّف أدع النواب يقوموا بواجباتهم, ادعنا على جلسة عامة نحكي حول هالاغتيالات السياسية نحكي حولها نتحاور..جيزال خوري: لوين بيودي هالشي؟ لوين بودي هالشي؟نائلة رينيه معوض: تا أقلّك نحنا واضحين نحنا..جيزال خوري: مش محققين النواب بس شو بيودّي هذه الجلسة العامة.نائلة رينيه معوض: كيف شو بيودي؟ نحنا ما منعمل أنو ما منحكي بشي, نحنا رافضين نكمّل مع هذه السلطة هذه الحكومة نحنا عم نطالب بانسحاب سوري يعني نبتدي بانسحاب سوري نكمل بـ..جيزال خوري: يعني اعتصامات ومظاهرات وعصيان مدني إلى أن تستقيل السلطة؟ نائلة رينيه معوض: بلشت.. بلشت, يعني..جيزال خوري: هيدي خطوة المعارضة يعني. نائلة رينيه معوض: بفتكر إنو هيدي بديهي إنو هالحكومة تستقيل وتجي حكومة انتقالية تنسحب القوات السورية إذا بالفعل بدنا انتخابات حرة ونزيهة. جيزال خوري: هاي الأداة كيف هالأداة بنزلة على الشارع؟ نائلة رينيه معوض: ما منقدر نقلّك كل شي الليلة جيزال..جيزال خوري: عندكم أسرار. نائلة رينيه معوض: لأ الحقيقة يعني في أشيا ما بدنا نحكيها قبل بوقت, بس بدي أقلك شغلة .. جيزال خوري: نعم، أنا بدي أسألك هل سيطبق 1559؟
نائلة رينيه معوض: بدّي أقلّك شغله أولاً اليوم لأول مرة بلبنان فيه شعب لبناني بكل فئاته بكل طوائفه بكل مذاهبه قاعد يداً باليد عم يصلّي وعم يعتصم ما عم يعمل عصيان مدني ما عم يعمل أي عمل تخريبي, حتى عم يكبّر عقله مبارح أجى على ساحة الشهداء شخص أكيد مبعوث من المخابرات ومنعرفها يعني تخينة جداً يسبّ بكل الشهدا يلي عم نسمّيهم دايماً منهن يسبّ برينيه معوض وأنا كنت موجودة وعملت حالي ماني سامعته لأني أنا عارفة أنو هيدا شخص مبعوت تا يخربط هالجو التوافقي هالجو الوطني الحقيقي, هالجو.. الصلاة حول ضريح الرئيس الشهيد رفيق الحريري تا نبيّن أنو لبنان يد واحدة وحاج بقا يقولنا مختلفين, وحاج بقا يقولنا استقرار لبنان مرتبط بالوجود السوري بلبنان, أبداً الاستقرار بلبنان مرتبط بالوفاق الوطني يلي بلش يتبلور بكل وضوح..جيزال خوري: السيد نصر الله نزّل ناس متظاهرين مبارح يبين أنو فيه كمان ناس تانيين موقفهم آخر.نائلة رينيه معوض: مظبوط, بدي أقلك شغلة أنا أولاً بعتبر بأنو يلي حصل بعين التينة بيضحّك يعني, لأن شيلي السيد حسن نصر الله على جنب، وأنا إلي نداء للسيد حسن نصر الله الباقي يعني بيخُتصر بعنجر تا نكون مهذبين يعني, أنا إلي نداء للسيد حسن نصر الله, السيد حسن نصر الله موقعه مع الأكثرية من اللبنانيين, موقعه مع الحق عند اللبنانيين, وحزب الله ما بينحمل إلا بالوفاق والتوافق بين اللبنانيين, ونحنا ما بحياتنا رح نعمل صفقة على ظهر فريق لولا منّه ما كان تحرّر لبنان من الاحتلال الإسرائيلي, بس نحنا بدنا نعمل حواراً جدياً وحقيقياً.جيزال خوري: ست نائلة بعد معنا دقيقتين.نائلة رينيه معوض: حوار ما يكون بدّو قرار، وهالقرار بقدر يلعب دور فيه أساسي السيد حسن نصر الله، بيقدر هو يروح عند الرئيس بشار الأسد يقول له يلي عم يحصل بلبنان ما رح يخدم حدا، وأكيد ما رح يخدم مصالح سورية بلبنان, وأكيد يلي شفناه بمأتم الرئيس الحريري كان فيه كره على سوريا, وأكيد نحنا اليوم بكل جرأة عم نقول نحنا نريد رغم جرحنا وجرحي الشخصي أنا بريد وكلنا منريد شراكة متوازنة وطوعية مع سوريا, رافضين الوصاية علينا, بدنا استقلالنا بدنا خيارنا الحر.جيزال خوري: وليد جنبلاط بيقول حاولوا قتل مروان حمادة قتلوا رفيق الحريري, من هو الثالث على مين خايفة؟نائلة رينيه معوض: بدك صراحة؟ يعني اليوم متل مارايحة القصة كلنا معروضين على.. نكون الضحية الثالثة طبعاً الرئيس جنبلاط.. الوزير جنبلاط إذا بدنا ناخد التسلسل بالأهمية راس الأفعى كان رفيق الحريري المعاون كان وليد جنبلاط والبوديجاردية كلنا علينا خطر أكتر أو أقل.جيزال خوري: بنص دقيقة فيه يعني كتير أخبار بالبلد برأيك من قتل رفيق الحريري؟ هل هو الطائف؟ هل هو 1559؟ أم دبلوماسية لارسن في الـ 1559؟ نائلة رينيه معوض: ممكن الثلاثة سوا. جيزال خوري: ست ليلى معوض شكراً لوجودك معنا ببرنامج بالعربي إن شاء يعني يكون هيدي آخر سلسلة الاغتيالات السياسية, حبينا كمان نتذكر شوي الرئيس رينيه معوض.نائلة رينيه معوض: أنا بشكرك بس بدّي أقول لك شغلة كمان أنا متأكدة أنو الانتفاضة يلي عم تحصل اليوم بلبنان هي بالفعل انتفاضة الاستقلال, وإن شاء الله منرجع معك ولهونه نقدر نقول أنو طلعوا السوريين من لبنان, الشعب اللبناني وبطرق سلمية وبوفاقهم وتوافقهم طلّعوا السوريين من لبنان, بوفاقهم وتوافقهم قدروا أسسوا لشراكة جدية متوازنة طوعية مع السوريين وأنّو رح نوقّف هون سلسلة هالاغتيالات..جيزال خوري: والدم..نائلة رينيه معوض: كفانا دم, كفانا وصاية.جيزال خوري: يعني ما منلبس إشارب أحمر منلبس إشارب من لون تاني.نائلة رينيه معوض: تا أقولك هيدي الاشارب رح تبقى رمز إعادة استقلال وحرية وقرار لبنان.جيزال خوري: ست نايلة شكراً لوجودك معنا شكراً للمشاهدين وإلى اللقاء الأسبوع المقبل.