في معجبة عمرها يمكن شي سبع سنين بتدق لي على طول بس أول مرة حكتني تلفنت على خلوي لجي جي بيرد عليها، قالت له: بدي احكي بليز نانسي وأنا بحبها كثير بس بدي إسإلك شي، قاللها جي جي: شو؟ قالت له: يعني هي بتشرب مي وبتاكل وهيك يعني مثلنا، قلها جي جي: مثلك وأكثر نانسي عجرم

- حلمت بالشهرة والوقوف على أضخم المسارح، نانسي عجرم حلمها الذي أصبح حقيقة.- إحساس جديد للصم والبكم، نانسي تخاطب شريحة مختلفة من الجمهور.ريما مكتبي: أهلاً بكم في برنامج محطات، نجمة هذه الحلقة فنانة لبنانية شابة دخلت عالم الشهرة من أوسع أبوابها, نانسي عجرم ابنة الثلاثة وعشرين عاماً ضيفة تطل عبر قناة العربية. حلمت نانسي عجرم بالشهرة منذ طفولتها, كان حلمها الوحيد أن تقف على مسرح كبير أمام جمهور عريض، حلمها تحقق, وها هي الآن فنانة شهيرة يردد أغانيها الملايين من العالم في العالم العربي. في لقاء برنامج محطات معها في منزلها مع أهلها, بدت الفنانة الشهيرة نانسي عجرم بعيدة جداً عن غرور النجومية، فهي تقول أن الفن بورصة اليوم تنجح هي وغداً فنانة أخرى، وأعمالها قد تكون ناجحة اليوم ولكن قد تفشل غداً، في حديث عن الحياة والسياسة والفن وحياتها الشخصية, لقاء خاص مع نانسي عجرم أعده وأخرجه نبيل قاسم.نانسي عجرم: اسمي الأصلي نانسي نبيل عجرم، بغني، عمري الفني يمكن من وقت ما كنت صغيرة يعني يمكن كان عمري شي 10- 12 سنة بس الاحتراف شي أربع سنين. عرض لأغنية نانسي عجرم وعمرها 4 سنيننانسي عجرم: بدي خبرك شغلة، أوقات أنا بنسى حالي أنا مين، يعني أوقات بكون ماشية عالطريق مثلاً وبشوف هيك فجأة بشوف بنت مثلاً إجت غمرتني ونزلت فيّ تبويس ومثلاً آخر شي بفيق آه إنت معجبة، بس أنا بقول أنه إذا الفنان يظل يفكر بهالفكرة بعتقد أنه بيعلوا رجليه عن الأرض شوي يعني إذا كل يوم بدي أقعد فكر أو كل ما قعدت مع حالي بدي قول إف أنا إف كيف إف نانسي عجرم, ويعني هيك بعتقد ببطل ناجحة أصلاً, بتتخيل طريقة مشيتي وطريقتي وقت إحكي وطريقتي وقت غني وهيك، بس أكيد يعني مش إنو ناسية الموضوع كلياً لأنه هيدي حياتي يعني حتى عم ترافقني يعني بكل يوم, كل يوم بوعى من النوم وهيك وهيدي شهرة، أكيد بنبسط لحالي بس بزيد قلقي كثير.نانسي عجرم: تذكرت شغلة صارت مرة معي في معجبة عمرها يمكن شي سبع سنين بتدق لي على طول بس أول مرة حكتني تلفنت على خلوي لجي جي بيرد عليها، قالت له: بدي احكي بليز نانسي وأنا بحبها كثير بس بدي إسإلك شي، قاللها جي جي: شو؟ قالت له: يعني هي بتشرب مي وبتاكل وهيك يعني مثلنا، قلها جي جي: مثلك وأكثر. نانسي عجرم: أوقات كثير مثلاً بيتلبكوا بحكيهن مثلاً بيجي مثلاً لعندي شخص بيقول لي: كيفك؟ بقول له: أنا منيحة الحمد لله، إنت كيفك؟ بيقول لي: منيح كيفك؟، بقول له: أنا كثير منيحة, إنت كيفك أهلك كيف شو أخبارك؟، منيح بحبك كيفك، منيحة. نانسي عجرم: كنت كثير أحلم, كنت حب وأحلم أنه بدي حب إنشهر حب تصير الناس تعرف الأغاني ويصفقوا لي، كون هيك واقفة على سايد كبير وفي عالم كثير كتير كنت أحلم بهيدا الشي، بس أنا وقت نزل "أخاصمك آه" تفاجئت لأنه ما كنت متوقعة النجاح هالقد, أكثر شي بمصر يعني صرت أسمع أخبار أنه غنيتك مش معقول شو عاملة بمصر, مش معقول هون بهالبلد وهيك، صرت أسمع هيك أخبار أنه عملك ضارب، يعني توقعت نجاح يعني مش هالقد، يعني كنت أحلم أكيد, ويمكن قد ما حلمت صاروا معي، ما بعرف يمكن قد ما حلمت قد ما صليت قد ما كنت حابة، يعني سبحان الله الإنسان وقت بكون من جوا حابب الشغلة, وعم يشتغل.. يعني أنا قبل كنت أشتغل لحالي يعني ما كان عندي إدارة سليمة مثل هلأ, يعني جي جي يعني بيغني عن عشرين شخص اسم الله، بس قبل كنت غني, كنت أعمل يعني كان عندي عمل أو اثنين بس ما أخذوا حقهن كثير، يعني وهيدا الشي منّه يعني ما ساعدني كثير ما خدمني أني أنشهر أو أن الأغاني ينشهروا حتى كليباتهن ما انصرف عليهن يعني منيح.نبيل قاسم: مين من اللي بغني هلأ بتحسي أنه في حدا عم يغني وشاطر؟ إنتي بتحسي حالك لحالك؟نانسي عجرم: أكيد لأ.نبيل قاسم: مين بيعجبك؟ أو يمكن ما بيعجبك بس مين ناجح مثلك بتقولي والله هذول شاطرين.

عجرم: الفن برأيي بورصة

	ما حدا بينّقي مين بحب أبداً، بس ما بعتقد أنه من مجال الفن يعني فيني حب حدا مش زابطة.. نانسي عجرم

نانسي عجرم: في كثير، في كثير شاطرين يعني أنا لو هلأ قلت لي إنتي حاسة حالك لحالك؟ لو أنا حاسة حالي لحالي ما كنت بنجح أصلاً, يعني ما كان لأنه حلوا أنه يكون فيه منافسة، حلوا هيك يعني أنه يكون في شي عم يشدك إنك تشتغل على حالك أكثر، أنا مثلاً وقت إسمع شي غنية ناجحة أو إحضر كليب ناجح أو إسمع شي عمل نزل لأي فنان أو فنانة وإنه أخذ شهرة هذا الشي بشجعني أكثر إني إشتغل على حالي، بقول: آه أنه برافو ليك شو عملت أنا بدي أعمل أحلى، يعني دائماً أنا بقول أنه لو دامت لغيري ما كانت إجت إلي، يعني هذا مثل كل العالم بتعرفه, بس يعني أنا بقول أن الفن أنا برأيي بورصة يعني اليوم أنا ناجحة يمكن بكرة غيري ينجح اليوم أنا عمل نجح كثير عمل اللي بعده يمكن ما ينجح قده, يمكن عمل باع كثير عمل ثاني يبيع أقل أو يبيع أكثر ما حدا يعني بيعرف، بس أنا اللي فيني قوله اللي فيني أقلك ياه أن الفنان هو بيؤثر على حاله وهو بينهي حاله وهو بيفشل حاله ما حدا بيؤثر عليه ولا.. يعني إذا فنان قديم حتى لو كبر ممكن أنه لو مين ما طلع من الجيل الجديد ما يؤثر عليه أبداً، بعطيك مثل يعني راغب علامة له 25 سنة نجم وبعده لهلأ عنده أغانيه حلوة, وأنا يعني من أنا من بعتبر حالي إله أنا إذا عمل حفلة كثير بحب روح إحضر له ياها، أنا برأيي أنه هو الفنان إذا ما اشتغل على حاله أوقات بتجي هيك ساعة تخلي يمكن بسموها بصير الفنان بصير يتكبر, بصير الأشياء اللي عملته ما يعترف فيها، الأشياء اللي كان يعملها سابقاً ما يعملها هلأ, الأشخاص اللي وقفوا حده ينكر جميلهم بصير مثلاً شعراء ملحنين الموزعين اللي كان يشتغل معهن بطل غير بكون غير ستايله هو كثير بيؤثر على حاله، يا طريقة حكيه مع الناس يا حسب مصداقيته مع الناس هيدا الشي كثير بيؤثر عليه.نانسي عجرم: مين بتجوز؟ نبيل قاسم: مين؟نانسي عجرم: نقيّه هلأ (ضاحكة).نبيل قاسم: إي، شو بتحبيه يكون؟ بتحبيه يكون زلمة مثقف ومعلم ولاّ بتحبيه يكون أقرب للفنان يعني يفهم جو الفنان، بالعادة زوج الفنانة ما بكون على هالقد.. أنت بتعرفي هي بتبقى أكثر من ما هو، يعني بيبقى هو على اسمها أكثر مما.. أنا بحس زوج الفنانة ما كثير إله طعمة إلا إذا كان عنده شغل حكيم مهندس بيظل يسافر, مش يكون وكيل أعمالها كل شوي يروح معها ويجي معها.نانسي عجرم: لأ أكيد، شوف ما حدا بيختار مين بحب هيدي أولاً، يعني الإنسان اللي بيحب مش بقصده ما بيعرف كيف بحب، أوقات أنا بكون بعشاء مثلاً بتصير معي مثلاً أوقات أنه بيلفتني شخص مثلاً بيلفتني حكيه تهذيبه, طريقته بس يحكي مع الناس, احترامه للناس بيبقى فيه كاريزما هيك بتلفتك بشخص, يمكن هلأ أعطيك أنا مواصفات مثلاً أنا بدي إنه حبيبي يكون كذا كذا, وأنا حب شخص عنده عكسهن, يعني ما حدا بينّقي مين بحب أبداً، بس ما بعتقد أنه من مجال الفن يعني فيني حب حدا مش زابطة..نبيل قاسم: ليه؟ نانسي عجرم: ما بعتقد بتزبط لأ لأنه يعني إنو كيف منعيش؟ هو ببلد وأنا ببلد والولاد على مين بدي أتركهن. نانسي عجرم: عملت منخاري حلو؟ ما حدا قلي..نبيل قاسم: ما أنا ما بدي إسألك أحسن ما تزعلي، بدي إسألك إذا هيدي رابع عملية تجميل إنه إلك بالمجلة قالوا؟ بقمر.نانسي عجرم: إي بس ما هو المنخار أول مرة إذا ما زبط كارثة كارثة بس كان نفسي مقطوع كمان عالآخر..نبيل قاسم: فتحلك جوا المجاري كلها..نانسي عجرم: إي وزبطت شوي صغيرة من هون هيك النارينات, لأنه بسوبر ستار حضرتوني كان عم يصورني من تحت، التوأ ما بعرف مين بس ما عجبني.نبيل قاسم: هلأ هيدا تجميل اللي عاملتيه؟نانسي عجرم: فوكسيونيل أكثر من تجميل بس إنه صغرت هيك شوي..نبيل قاسم: الفتحات شوي.نانسي عجرم: النارية.نبيل قاسم: إي أحلى.نانسي عجرم: إي أحلى.نانسي عجرم: أنا مش ضليعة بالسياسة كثير الكل بيعرف, يعني ما بعرف حتى الأسامي ما بعرف الهيدا.. بس يعني عم بحضر الأخبار لحتى أعرف أنا وين عايشة؟ وليش عايشة؟ وكيف عايشة؟ لأنه يعني صرنا عايشين والموت قريب منا كثير ما حدا بيعرف شو بصير معه، أكيد يعني مثلي مثل كل اللبنانيين أول شي بزعل وبتأثر على كل شيء بصير ببلدي, إذا صار يعني حرب هلأ الحرب اللي صارت الناس اللي ماتت, الناس اللي فلّت من بيوتها, الناس اللي تهجرت الناس اللي هاجرت اللي سافرت يعني أكيد هيدا الشي كمان أنا كمواطنة بيزعلني, وعم بخليني يعني عم يجبرني أحضر وتابع كل يوم بيومه، وعم يخليني كون أنا حريصة شو بدي أعمل بالمستقبل بمستقبل أولادي مستقبل أخواتي مستقبل الناس.أنت حبيبي وحدك..إنت حبيب العمر..وبدي إبقى حدك.. عالحلو وعالمر..إنت حبيبي وحدك..إنت حبيب العمر..وبدي إبقا حدك..عالحلو وعالمر..شو بحس بأمان لأنك حبيبي..وعلى طول الزمان رح تبقى حبيبي..إنت يا لبنان..إنت حبيب العمر..إنت يا لبنان..إنت حبيب العمر..نبيل قاسم: ميرسي بشكرك عالوقت اللي عطيتينا ياه.نانسي عجرم: ميرسي إلكن.ريما مكتبي: إحساس جديد للصم والبكم، كليب نانسي عجرم يخاطب هشام ورفاقه، تابعونا بعد الفاصل.[فاصل إعلاني]ريما مكتبي: في خطوة لافتة في عالم الأغنية المصورة اليوم, تغني نانسي عجرم لشريحة مختلفة من الجمهور, الصم والبكم، ففي أحدث أعمالها تظهر نانسي عجرم وهي تغني لحبيبها الأصم والأبكم بتلك اللغة الصامتة.

نانسي تغني للصم والبكم

هشام شاب لبناني أصم وأبكم، تابع الأغنية وفهم معانيها، زوجته قالت إن الأغنية شكلت لديها حافزاً قوياً لكي تتعلم لغة الإشارة, وبالتالي يصبح التواصل مع زوجها أقوى، ولكن هشام لم يفهم لماذا لم يستعن مخرج الكليب بشاب أبكم وأصم فعلياً ليؤدي الدور، ولكن المخرج سعيد الماروق الذي أخرج كليب نانسي عجرم قال إنه لم يجد شخصية الممثل الأصم والأبكم الذي يمكن أن يسند إليه الدور.نسرين حاطوم: هذا هو تعبير وجه هشام، شاب أصم وأبكم حين تغني له زوجته حنان أغنية نانسي عجرم إحساس جديد التي تطرقت لمشكلة الصم والبكم، يتفاعل هشام مع معاني الأغنية من خلال لغة الإشارات التي تعلمتها زوجته للتمكن من التواصل معه. كانت سعادة هشام لا توصف حين رأى كليب إحساس جديد بهذا الأسلوب الفني، فشعر وللمرة الأولى أن هناك أحداً التفت إلى مشكلتهم وتحدث عنها بطريقة جميلة وحساسة.هشام: فيه كثير رفقاتي حبوا مثلي، بس كمان رفقاتي قالوا لي يا ريت تكتر لغة إشارة لأنه كان قليل شوي، كم كلمة يا ريت تجي لغة إشارة لأنه الكل بشوفه أكثر.جمال سلمان (والدة هشام): بتحسي بساعات.. يعني بتحسي هو لما بيطلع فيه بحس بعيونه السعادة إنه فيه حدا حاسس معهن عرفتي القصد، أنه فيه حدا شاعر معهن وخاصة مطربة مثل نانسي عجرم معروفة ومحبوبة كثير يعني، فهو كثير بحبها, فكيف إنو تقدر وضعهن وتعايشهن مشكلتهن يعني هي بيعتبروها إنو هي عم تعايشهن مشكلتهن، عم تحسس العالم إنهم ناس عاديين يمكن ينحبوا ويحبوا يعني هي شغلة كثير منيحة كمان.نسرين حاطوم: أما زوجة هشام التي تعلمت لغة الإشارة منذ أن تعرفت عليه, ذكرها دور نانسي عجرم في الكليب ببدايات علاقتها بهشام, حين كانت تجلس ورفاقه الصم والبكم ويتحدثون جميعاً بلغة الإشارة لساعات وساعات.حنان سلمان (زوجة هشام): بحس حالي محل نانسي وقت فتت قعدت على طاولة رفقاته, فتت إنه ضجة ضجة ضجة بس بلا ضجة، يعني الكل الكل عم يحكي بس ما فيه صوت، بكون مثلاً بالبيت أقعد مثلاً أنا غنيله ياها وكذا وقله يقول لي شو عم تعملي شو عم تجني عم تقلدي نانسي عجرم شو باكي، لأ حب حب الفكرة.نسرين حاطوم: لكن هشام الذي يعمل مذيعاً لنشرات الأخبار في إحدى المحطات المحلية كان يفضّل لو أن المخرج سعيد الماروق لجأ إلى ممثل أصم وأبكم فعلاً، غير أن للمخرج اعتبارات فنية أخرى وهو للمناسبة ابن لوالدين أصمين وأبكمين.هشام: فيه ملاحظة نانسي عجرم تتخذ واحد أصم بدل ما يكون مع شخص ليش مع واحد عادي يعلم الإشارة.سعيد الماروق (مخرج): كنت عم حاول دور على شاب أصم وأبكم بس ما لقيت, كان فيه مواصفات معينة بدي ياها ما أنه كانت مقصودة تكون هيك، بس كان فيه.. يعني مش معناته الشاب يعني مش معناته كل الناس بتعرف تمثل ومش معناته كل اللي ما بيحكوا بيعرفوا يمثلوا، فأنا حاولت إني شوف بس لقيت إنو رح فوت بريسك تمثيل أكثر، عرفتي كيف, إضافة إنو في عندك الأكشن كيف بدنا هو بالبوت كيف بدنا نعطيه إشارة، فكانت شغلة رح تعذبنا دبل، عرفتي كيف فكان ضروري شاب يكون بيسمع.. وكان عندي ثلاثة آخر شي بالمجموعة اللي قاعدين، الثلاثة حقيقة ما بيسمعوا.نسرين حاطوم: هذا العمل الفني استطاع أن يدخل إلى قلوب المئات من البيوت التي تعايش مشكلة الصم والبكم, وهذا أمر اعتبره والد هشام إنجازاً تاريخ الأغنية العربية, ونقلة حضارية في موضوع التواصل البشري. هذا النوع من الأغاني المصورة استطاع أن يدخل إلى قلوب الكثيرين أمثال هشام وأصدقائه, الذين طالبوا باهتمام أكبر بوضعهم داخل المجتمع، ذلك أن مسألة دمجهم لا تقتصر على الدراسة والعمل فحسب بل تشمل أيضاً أحاسيسهم وأذواقهم الفنية. لبرنامج محطات - نسرين حاطوم - العربية - بيروت.ريما مكتبي: عسى لو يمكنني أن أوجه أطيب التحيات بلغة الإشارة، ولكنني لا أعرف, إلى اللقاء في محطات جديدة.