إيلي ناكوزي: أهلاً بكم مشاهدينا في هذه الحلقة الجديدة من بصراحة وهذه المرة من بيروت بعد وصول كان متعثراً جداً بسبب إقفال مطار بيروت، وطبعاً بعد كل ما حصل خلال الأسبوع المنصرم اللقاء اليوم يجمعنا من النائب سمير فرنجية أحد أبرز العقول الاستراتيجية والمخططة في قوى 14 آذار والأسئلة طبعاً كثيرة عما جرى وعن المرحلة المستقبلية وعن موقف المسيحيين في هذه الأزمة وكيف كانوا ليتصرفوا فيما لو امتد وجود المسلحين إلى المناطق المسيحية. ماذا يشرح عما حصل في بيروت هو الذي عاش معظم الحرب اللبنانية في بيروت؟ ماذا حصل في الجبل؟ وهل فعلاً قرار الحكومة كان قراراً بالصدفة أم كان قراراً مخططاً له من قبل 14 آذار لجرّ المقاومة ولتعرية صورة المقاومة الإسلامية في لبنان؟ كيف يرى المستقبل؟ هل ما زالت قوى 14 آذار مصرّة على أن العماد سليمان هو المرشح التوافقي أم أن الأمور تغيّرت؟ ماذا سيحدث في قطر؟ هل هناك تفاؤل أو تشاؤم؟ كل هذا بالإضافة إلى أسئلة كثيرة نطرحها في هذه الحلقة من بصراحة اليوم ودائماً مع النائب سمير فرنجية إلى هذا اللقاء.
إيلي ناكوزي: سمير بك فرنجية أولاً شكراً لتلبيتك هذه الدعوة وباسمي وباسم العربية بتشكّرك في هذه الظروف نعرف طبعاً في طبخات سياسية كبيرة وأنت مشهور يعني بإعداد هذه الطبخات، في كتير أسئلة بدنا نطرحها مش فقط حول ما حدث يعني بالتحديد في الشوارع والأشياء المؤسفة اللي شفناها إنما يعني في أسئلة كتير عم تنطرح علينا كلبنانيين كمان عايشين خارج البلد، في أشياء غير مفهومة، في أشياء تتعلق بالمستقبل مستقبل هذا الوطن وهذا البلد، صار فيه شكوك عند اللبنانيين وبالتحديد المغتربين، طبعاً أهل البلد أدرى ولكن بالتحديد عند المقيمين والمغتربين في شي غير مفهوم صار بالبلد. أولاً خليني أبدأ بالسؤال اللي عم يتكرّر ويطرح يعني من قبل تقريباً أغلبية المواطنين. هل جرّيتوا حزب الله إلى ما حصل؟ وهل هذا الأمر كان مخططاً له من قبل يعني القوى السياسية المفكرة في 14 آذار؟ أم فعلاً هدول القرارين اتخذوا بالصدفة وما كانت 14 آذار عارفة..

ما جرى بلبنان لم يكن بسبب القرارين

سمير فرنجية: بتصوّر أن القرارين مش هنّن اللي تسببوا بما جرى، كان قرار حزب الله بعمل اللي بدّو يعمله، يعني لا يعقل أنه بظرف كم ساعة يتم استقدام قوات حزب الله من منطقة الجنوب والبقاع، استنفار الحزب القومي استنفار حركة أمل، التحضير لاجتياح مدينة بكاملها كرد فعل على القرار، والدليل أنه كان في مظاهرة مبرمجة بالمطالب العمالية، وكان الحكي أنه يعني يصير في شغب بهذه المظاهرة، فشلت المظاهرة وبدأ الشغب مباشرة، قرار الحرب بلبنان اتخذه حزب الله، اتخذه باعتبارات تتعلق فيه، مسألة الكاميرا اللي تم اكتشافها على طريق المطار هي مش كاميرا عادية، هي كاميرا موصولة بجهاز فني يدل الطيارة وين صارت وكيف صارت وإلى آخره. هذا الاكتشاف خليني أقول والتدبير اتخذ بحق المسؤول عن أمن المطار يعني مسألة كان ممكن الاعتراض عليها يعني أساليب مختلفة.
إيلي ناكوزي: بس أنتو أعطيتهم الذريعة يعني متل ما هنّن اتهمتوهم الماضي أنه أعطو الذريعة لإسرائيل، اليوم 14 آذار وكأنها أرادت أن يحصل ما يحصل يعني طبعاً لم تريد أن يقتل ناس وأن يحصل ولكن فيه وكأنه يعني بعرف أنكم سياسيين بالآخر ما معقول يعني مش عارفين خطورة هذا القرار وما معقول تكونوا جرّيتوا الحزب إلى يعني كشف صورته الحقيقية أن هذا السلاح ليس سلاح مقاومة إنما سلاح ميليشيا مسلحة في لبنان.
سمير فرنجية: لو كنا عم نستدرجه كنا منكون محضّرين نفسنا لمواجهة ما جرى، كنا أخذنا احتياطاتنا، كنا نقلنا بيوتنا.
إيلي ناكوزي: احتياطاتكم بالقتال مثلاً يعني؟
سمير فرنجية: الأمنية. لأ لحماية أنفسنا يعني مش أنه والله بدأ القتال وأصبح سعد الحريري ووليد جنبلاط محاصرين ببيوتهم. اللي بيكون عم يستدرج الآخر ما بيكون كمان متوقع رد فعله بهذا المعنى؟ لأ اللي صار هو تدبير أزعج حزب الله لا شك ولكن هذا التدبير لا علاقة له بما حصل، قرار اجتياح بيروت ووضع اليد على السلطة المركزية قرار مأخوذ عند حزب الله، وتبين أن التحضيرات من توزيع أسلحة، من إقامة معسكرات تدريب لكل القوى السياسية اللي تابعة لحزب الله، هذا موضوع جاري من أشهر، وهذا فيه بالإعلان ظهر في يعني مناسبات عدة. لأ قرارهم هو أنهم بجوّ التحولات عم بتصير بالمنطقة وضع اليد على لبنان، ممكن يؤمّن لهم شيء من الحماية بنظرهم، ما جرى انعكس سلباً علينا، بس بالتخطيط أن هذه الحكومة هلأ ساقطة بهالمعنى، بيروت بكم ساعة، منطقة الجبل بمجرد ما نبعت يعني فرق عسكرية على أطراف الجبل بيسقط الجبل بدون قتال، وضعنا يدنا على البلد ومنفاوض من هالموقع، وما بيفاوضونا نحن، بيفاوضوا نيابة عن إيران، بيفاوضوا بملف اللبنانيين ما لهم علاقة فيه الملف النووي بهذا.. بهالـ.. يعني حجم ما حصل يعني لا يتناسب مع التدبير اللي أخذته الحكومة.
إيلي ناكوزي: طيب. نجحوا، أسقطوا بيروت عسكرياً، كاد الجبل أن يسقط، صار فيه مقاومة بالجبل، ولكن وليد بك جنبلاط استدرك، استدرك مجزرة بالآخر، يمكن كانوا قادرين كانوا حسب الأخبار والمعلومات أن المعارك لم تكن سهلة في الجبل وكان في كتير ضحايا من الحزب ومن الأحزاب المشاركة ولكن يعني نجحوا باللي عم تتفضل فيه، هل يعني إسقاط بيروت عسكرياً وإسقاط الجبل.. شبه إسقاط الجبل عسكرياً أدى إلى إسقاطكم سياسياً أو أنكم تروحوا ضعاف على هذه المفاوضات اللي عم تجري بقطر؟
سمير فرنجية: هو أولاً يعني في.. سقطت بيروت قبل هالمرة، سقطت بالاجتياح الإسرائيلي.
إيلي ناكوزي: بس عم تقارن مقارنة خطيرة.
سمير فرنجية: بقلّك كسقوط.
إيلي ناكوزي: اجتياح حزب الله، حزب الله طرف داخلي وبدّه يأخذ ثمن سياسي لهذا الإسقاط العسكري اللي صار بالمدينة.
سمير فرنجية: يعني لما بيتصرف حزب الله بالشكل اللي تصرف فيه بمدينة بيروت ما بيكون جزء من بيروت، وأي فريق بلبنان حزب الله أو غيره فريق إسلامي مسيحي سني شيعي بيتصرف تجاه مدينته بهذا الشكل، لأ بكون غريب عنها. المقارنة اللي عم بعملها دقيقة، الجيش الإسرائيلي دخل بيروت وأخضع بيروت، بعد أسبوع زمان كان طالع من بيروت، لما بدّه واحد يفوت على بيروت على قاعدة أنه هو يحتل بيروت، لا، ما بيضاين، وأثبتت التجارب بهذا. فالطريقة اللي تصرف فيها حزب الله ببيروت طريقة غزو بيروت، عشيرة وفالتة وقررت أنها بلحظة من اللحظات تحتل مدينة، لأ. يعني كيف ما أحبوا يعرضوها جماعة حزب الله ما عندي في يعني ضرب من الخوارق ما تم ببيروت، انسى لي النتائج السياسية، قبل ما نفوت على النتائج السياسية ما جرى في بيروت أنا يعني موجود من لحظة اندلاع الحرب اللبنانية، ومرق يعني مثل ما بتعرف وكنت ببيروت الغربية، ما تركت بيروت الغربية، وبالتالي بعرف تماماً يعني دخول حزب الله اليوم قد تكون بالنسبة لإلي قد تكون أخطر ما شاهدته بخلال هالثلاثين سنة، لأنه في نسيج بشري مترابط فيما بينه، بكل بناية ببيروت في عندك وخاصة بالقسم اللي احتلوه من بيروت يعني بين هلالين في عندك مسلمين سنة عايشين جنب مسلمين شيعة عايشين مع مسيحيين عايشين مع.. في هذا التنوع
إيلي ناكوزي: انضربت هذه التركيبة يعني.
سمير فرنجية: انضربت مش لأن السكان بدهم يضربوها، المأساة اليوم مزدوجة. عندك مأساة المسلمين السنة اللي شافوا هاجمة عليهم يعني فتنة واندلعت، وعندك مأساة المسلمين الشيعة، اللي هنّن ما حدا منهم طالب من حزب الله ليتصرف بهذا الشكل!! حزب الله بالنتيجة بينسحب إلى يعني مناطقه وشو بيعمل بالناس اللي.. فتح جرح من الصعوبة أن يتسكّر بسرعة.

صراع سياسي أم صراع طائفي؟

إيلي ناكوزي: بس ليش سمير بك محاولة تصوير الموضوع أنه شيعة وسنة بالوقت اللي المقاومة أعلنت يعني الحرب على مشروع السياسة، يعني أعلنت يعني كأنه هناك مشروعين ويجب أن ينتصر مشروع، بالمقاومة في سنة وفي شيعة وفي دروز وفي مسيحيين يعني ما تم الهجوم مثلاً على المناطق المسيحية، ما تم الهجوم على مناطق درزية مؤمنة بمشروع المقاومة، كما أنه لم يتم الهجوم على الحلفاء السنة يعني ليش عم تحاول تقول أنه شرخ سني شيعي؟
سمير فرنجية: لأنه هو لما بتواجه إسرائيل، إسرائيل محتلة بلدك، بتواجهها من منطق وطني، أنت في عندك قضية قادر يعني تعرضها لكل اللبنانيين، مسألة مقاومة احتلال الأرض. أما لما بدك تفوت على بيروت ما منطقك بيصير منطق مذهبي، منطق عصبي، عصبيات مذهبية، اللي عم يقاتل إسرائيل على أرض الجنوب غير عم يقاتل مشروع أميركي صهيوني بشوارع بيروت، وضد أهل بيروت، بعدين مين أعطى.. مين عاطيه لحزب الله الحق أن يتصرف بهذا الشكل؟ المأساة عند هذا الحزب أنه ما بيعرف لبنان، مأساته أنه بسبب تركيبته الأيديولوجية ربما بيعرف كيف الوضع بإيران، بس ما بيعرف شو الوضع بلبنان. وبدليل أنه ما بيعرف الوضع بلبنان حدا بيقوم باللي قام فيه؟ حدا بيحاول اليوم حدا بيحاول يدخل على الجبل؟ بمعزل عن المقاومة العسكرية..
إيلي ناكوزي: عم نحكي بالسياسة طبعاً.
سمير فرنجية: عم بحكي بالسياسة، أنه.. اشرح لي كيف بدك تفهم الناس أن دخول مجموعة من المقاتلين لحزب الله على ضيعة بمنطقة عاليه أو بمنطقة الشوف هذا عمل مقاوم بامتياز. بعدين إضافة..
إيلي ناكوزي: عفواً. تبررت هذه المسألة أنه فيه اعتداء من قبل الحكومة على المقاومة وهذه ذراع إسرائيلية أميركية التي تعتدي بواسطة أدوات الأميركان اللي هنّن أخيراً 14 آذار.
سمير فرنجية: بصير البلد أن طوائف بأكملها هي طوائف صهيونية، وطوائف بأكملها هي طوائف وطنية قومية عربية مقاومة؟ لأ فيه مشكلة بهالشي. حزب الله ما قال في مشروع سياسي بدّي حاول أنا أسقطه، عمل هجمة على منطقة بكاملها بسكانها ببشرها بناسها بصغارها بأطفالها بنسائها هولي كانوا عم يتبهدلوا بشوارع بيروت، هولي هم رمز يعني رمز العدوان الصهيوني على المنطقة العربية؟ بني آدمين طبيعيين قاعدين ببيوتهم، قاعدين بمحلاتهم، هولي صاروا هلأ عم نحارب إسرائيل عبرهم؟ فيه خطأ جسيم ارتكبه.
إيلي ناكوزي: كيف كان بدك..؟

سقوط دعوى المقاومة عن حزب الله

سمير فرنجية: وبعدين خليني كون صريح معك، كلمة مقاومة لم تعد مقبولة عند اللبنانيين.
إيلي ناكوزي: وهذا ما كنتم تريدون، وهكذا نصبتم الفخ.
سمير فرنجية: ما في فخ. صدقني الطوائف، الأحزاب الطائفية لما تصل إلى لحظة نهايتها ترتكب حماقات قبل ما يرتكب حزب الله حماقته ارتكب الميليشيات المسيحية ارتكبتها، قبل وبمشروع شبيه، وضع اليد على البلد بحجة أنه بوقتها اعتبرت الميليشيات المسيحية أنها عم تدافع عن لبنان بوجه المقاومة الفلسطينية وو..
إيلي ناكوزي: فارتكبت الحماقة
سمير فرنجية: ارتكبت الحماقة. لما دخلك لما فاتوا المسيحيين ببعضهم بحرب الإلغاء بالـ 89..
إيلي ناكوزي: الحماقة الكبرى هاي، مش حماقة عادية.
سمير فرنجية: العماد عون والقوات اللبنانية. طيب شو صار؟ كان فيك تبرر اليوم أن الناس تقتل بعضها بالشكل اللي شهدناه؟ بلحظة من اللحظات أزمة لبنان رح قلّك شو هي، رح ألخص لك إياها بكلمة، أنه كل طائفة بتخوت بنفس الطريقة اللي عم تخوت فيها طائفة أخرى. بس مش بنفس الوقت، هذا المشكل، يعني بدال ما يكون بخلال سنتين شهدنا الخوات الطائفي، وانتهينا منه، لأ كل طائفة..
إيلي ناكوزي: كل فترة..
سمير فرنجية: لأ مش كل فترة.. كل طائفة بحاجة أنها تمرق بهذا الامتحان حتى تعيد تكتشف أنها مانها وحدها بالبلد، وأن هذا البلد ما بيندار بمنطق الغلبة، وأن هذا البلد بحاجة إلى دولة تنظم العلاقات ما بين الطوائف والمواطنين. هذه بتاخذ وقت. أنا برأيي اللي عم نشوفه اليوم هو نهاية لهذا المشروع البديل اللي معتبر أنه قادر ببلد متنوع نظرياً نصه مسيحي ونصه إسلامي، والنص الإسلامي نصه سني ونصه شيعة، وعند الشيعة نصهم مع حزب الله والنص التاني مش مع حزب الله، هذا النص من النص من النص بدّو يفرض مشروع لا علاقة للبنان فيه، مشروع ولاية الفقيه، مشروع الثورة الإيرانية، مشروع عالم آخر، ففيه استحالة. أنا أول ما يعني اندلع القتال ببيروت، قبل.. حتى قبل بيوم يعني سكّروا مطار بيروت قلت يعني بتصريح أنه يعني فيه استحالة لهذا المشروع، مكلف على الناس، ومُكلف على كل طوائف لبنان ومُكلف على كل اللبنانيين، بس فيه استحالة، حتى إذا نحنا بدنا ننجحه هذا المشروع في استحالة ما لها علاقة لا بأميركا ولا بإسرائيل ولا بزمبابوي، لها علاقة بطبيعة البلد وبتركيبة البلد، هول الجماعة مش قاريين عن البلد، ما بيعرفوا شو هو هالبلد. قيادات حزب الله يبدو أن عقلهم بمحل آخر.
إيلي ناكوزي: سمير بك رح أتوقف مع فاصل صغير ونعود من بعده لمتابعة يعني هذه النقطة وطبعاً شو رح يصير بقطر؟ شو ممكن الاتفاق بقطر؟ هل يعني فعلاً هذا التفاؤل اللي فجأة كل الناس اليوم عم نسمع الناس متفائلة جداً أنه بقطر رح يصير في اتفاق على الرئيس على الحكومة على قانون الانتخابات، هل أنتم كقوى سياسية يعني متفائلين؟ أم بتعتبروا ما يجري في قطر هدنة طويلة الأمد بعد هذا الفاصل؟
[فاصل إعلاني]

هل تحول سيد المقاومة إلى مقتدى الصدر

إيلي ناكوزي: نتابع إذاً هذا اللقاء ودائماً مع أحد أبرز وجوه قوى 14 آذار السياسية. أردتم تحويل سيد المقاومة إلى مقتدى الصدر، والبعض يقول نجحتم، يمكن مش من خلال القرارين ولكن كان في محاولات عديدة منكم إلى يعني نزع هيدي صفة المقاومة وهلأ بعد يومين على انتهاء الأحداث أو يوم واحد بديت سمير بيك تقول ما تسموها مقاومة هاي مش مقاومة. إذاً ما بعرف إلى أي حد نجحتهم إلى تحويل يعني حزب الله إلى جيش المهدي وإلى.. وكأنه عصابة وكأنه يعني داخل يحتل مناطق مثل ما بيصير بمدينة الصدر ويعني عذراً على المقارنة ولكن هناك أقاويل من هالنوع، ونسيتوا يعني أن المقاومة حررت الجنوب، المقاومة يعني دفعت الشهداء ودفعت أثمان غالية وقاومت وحررت ولا يمكن أن تقارنوها بمقتدى الصدر ولا يمكن أن تحوّلوها إلى جيوش وعصابات وميليشيات.
سمير فرنجية: يعني مطالبة طوائف لبنان بالمشاركة هذا حق. حزب الله ما بدّي أحكي الطائفة الشيعية رح أرجع على الطائفة الشيعية. حزب الله عنده دولة. عنده منطقة في تقريباً نص لبنان مسيطر عليها وفارض عليها قوانين. عنده مؤسساته، عنده سلاح أهم من سلاح الجيش اللبناني، ولا يخضع لأي يعني رقابة حتى، تمويله مباشر عبر إيران. شايف؟ هذا عنده دولته وعم يجي يقلّك هاي الدولة الثانية كيف فيني آخذ فيها حصة على الأقل حصة تعطيلية؟ هذا هو مشروع حزب الله. أما فيما يتعلق بالطائفة الشيعية موضوعها مختلف، الطائفة الشيعية هي أول طائفة بلبنان طرحت فكرة نهائية الكيان اللبناني. بيان بأيار 1977 لما كانوا المسيحيين عم بيفكروا بعدهم بالتقسيم والمسلمين السنة عم يفكّروا بالوحدة العربية، الطائفية الكيانية الأساسية بلبنان كانت الطائفة الشيعية. بالنصوص أهم النصوص اللي طلعت هي نصوص الإمام محمد مهدي شمس الدين. شو هو رسالته للشيعة؟ الاندماج بالمجتمعات الوطنية. بالتالي التوجه الأساسي الشيعي هو لبناني، هو كياني متل ما منقول. جاء حزب الله ينقل هذا التوجه الكياني ويحطه بتصرف أحمدي نجاد، في شي مش طبيعي.. فيه جريمة هون عم يرتكبها حزب الله بحق الطائفة الشيعية. أما في مسألة المشاركة ما هو الكلام وأنت عشت هذا الكلام، الإحباط المسيحي ما بقى عنا صلاحيات، وهلأ إحباط شيعي، وبعد شوي إحباط ما بعرف أي طائفة، بتطور دولتنا في قرار بدنا ناخذه كلنا سوا، مسألة تقاسم السلطة بين طوائف وهالطوائف يمثلوها أحزاب وبالتالي هذه السلطة بتتعطل هيدا جربناه على مدى خمسين سنة، حان الوقت نطرح فكرة الدولة المدنية، طرحناها بـ 14 آذار قبل ما طرحتها الكنيسة المارونية، التجاوز بدي باتجاه الأفضل، مش باتجاه مزيد من التفتيت لدولتنا. حمايتنا من دولتنا. إذاً لازم تكون هالدولة قوية، حتى تكون قوية ما بدها تكون خاضعة لصراعات الطوائف الدائم، لأنه بكل لحظة يعني واحد بده يعمل زعيم بـ..
إيلي ناكوزي: الدولة المدنية بشكل يعني.. بس اللي صار اليوم وبدّي أسأل هون أسئلة صريحة مش دائماً بتنطرح. بعد اللي صار اليوم يحق للفريق المسيحي أو غير فريق أو السني أو الدرزي أنه يرجع ويقول ويطالب بالأمن الذاتي والحماية الذاتية؟ هل يحق لسمير جعجع أن يقول أنا كنت على حق دائماً، أنا يجب أن أكون مسلحاً قوياً وأدافع عن نفسي؟
سمير فرنجية: بتصور يعني من الحكمة هو التصرف اللي قاموا فيه سعد الحريري ووليد جنبلاط، لأنه بلحظة الهجمة رد فعل طبيعي عند الناس، حق الدفاع عن النفس، كنا رحنا بهذا الاتجاه، الأمن الذاتي وكل واحد يشكل ميليشيا وما بعرف شو.. فضلوا يبقوا محاصرين بدون سلاح بحماية نظرية اسمها حماية الدولة من أن يرجعوا ويفوتوا البلد بهذا المسار التدميري.
إيلي ناكوزي: الجمهور والطائفة تحديداً لا تؤمن بالرجل المستسلم، تؤمن برجل قوي الذي يستطيع حمايتها، وهيدا تركيبة لبنان، يعني اليوم طبعاً لا أقصد لا الصديق سعد الحريري ولا الصديق وليد جنبلاط، ولكن يعني المظهر الضعيف للقائد يفقده الكثير، ويفقده الكثير على صعيد شعبيته وعلى صعيد بكرة بالانتخابات أنه.. طيب هذا الزعيم لا يستطيع حماية طائفته بالآخر، يعني والدفاع عن النفس حق يعني.
سمير فرنجية: خليني أكون واضح، ما فينا نقول.. ما فينا نطالب بشيء ونمارس عكسه. قلنا نحن مع الحق ضد القوة، بلحظة اغتيال الرئيس الحريري طالبنا بالحق، ما طالبنا بالانتقام، ما قلنا بدنا نقوم بعملية ثأرية، قلنا بدنا الحق. اللي يطالب بالحق بهذه اللحظة ما فيه اليوم يقول لأ بدي أمارس مثل ما عم يمارسوا أخصامي. هلأ رد فعل الناس بالحرقة بفهمها، بس هي حماية لإلو، وخليني أقول لك أنه اليوم المهزوم الفعلي هو حزب الله، مش سعد الحريري المهزوم. حزب الله المهزوم.
إيلي ناكوزي: كيف يا بيك هيك بتغيّروا الحقائق؟ كيف. كيف..؟
سمير فرنجية: يعني ببساطة..
إيلي ناكوزي: فرجانا عرض لقوة ما في طائفة بلبنان بتقدر تسيطر بهالسرعة يعني هيك بساعات قليلة وقيل أنه لو ما.. لو ما يعني عين ميشال عون الساهرة وتفاهم عين ميشال عون الساهرة وتفاهم ميشال عون مع الحزب لكان يعني مصير أيضاً المنطقة الشرقية ولكان مصير سمير جعجع أن يحاصر في مقره.
سمير فرنجية: هل هذا يعني أن مشروع حزب الله هو أنه يعني يحتل عسكرياً كل لبنان؟ يعني حتى يكون حاميه ميشال عون؟
إيلي ناكوزي: يسقط المناطق الأساسية يعني.
سمير فرنجية: اللي عنده هذه القوة مش قادر يترجمها سياسياً هذه عبء عليه. بلبنان ما حدا قادر يترجم قوته العسكرية إلى مكاسب سياسية. ما حدا. قبله في كمية ميليشيات جربت، وصدقني يعني ما حدا ينقصه لا سلاح ولا تمويل ولا دعم خارجي ولا.. كلهم كان عندهم تمويل وسلاح ودعم خارجي، وين صاروا؟ مين باقي؟ مين بقي على قيد الحياة؟ اللي عندهم المدفع؟ هولي صاروا بالمهاجر، بقيوا الناس. الناس لأ العلاقة فيما بينهم ما تبنى على موازين القوى، مش أنه الشخص بيشوف شخص آخر بالشارع بيطلّع شو موازين القوى الدولية بيسلم عليه أو ما بيسلم عليه. ما هذا المنطق اللي فات فيه حزب الله منطق بيدمر حاله فيه.
إيلي ناكوزي: صحيح ولكن لو بني لو بُني تفاهم مع حزب الله كما فعل العماد عون، يعني المسيحيين ألا يشعرون اليوم بامتنان للعماد عون أنه يعني تفاهم وحمى المنطقة وجنّبها ولا ضربة كف؟

منطق عماد عون منطق أهل ذمة

سمير فرنجية: أولاً خليني كون كون هيك.. يعني هذا المنطق اللي عبّر عنه العماد عون منطق أهل ذمة.
إيلي ناكوزي: كيف يعني؟
سمير فرنجية: يعني بدهم حماية من فريق آخر. نحنا منطقنا هو منطق الدولة اللي بتحمي، مش التفاهم مع الأبضاي بالحي هو اللي بيحميني أنا ببيتي. هو وجود دولة اللي بيحميني. المسيحيين مش أهل ذمة. المسيحيين شركاء بهالمنطقة. شركاء بلبنان. شركاء بالعالم العربي. اللي بيصير على بيروت الغربية لأ بينعكس فوراً على المنطقة المسيحية. اللي بيصير بالعالم العربي بينعكس على على.. نحن جزء من هالمنطقة، مش أطراف بحاجة لحماية من أحد. حمايتنا من حماية بعضنا. يعني من حماية الدولة المشتركة فيما بيننا. هذا المنطق اللي عم يحكي فيه العماد عون؟ هذا منطق مذل، أنا إذا بحاجة إلى حماية حزب الله لأعيش بلبنان لأ بفضّل هاجر.
إيلي ناكوزي: مش تفاهم يعني..
سمير فرنجية: تفاهم أيش؟ وحماية شو؟ أن مجموعة فلاته على عاليه وهدّاها العماد عون؟ إذا هذا المنطق أشرف لي أنا اليوم أترك البلد. أنا حمايتي بدّي أجي أطلبها من فريق بلبنان؟ حمايتي باخدها من دولتي اللي أنا مشارك فيها متل ما مشارك الفريق الآخر فيها. هذا منطق عشائري هذا ومنطق مذل يعني مرفوض هذا المنطق اللي عم يحكي فيه العماد عون.
إيلي ناكوزي: خليني أتوقف مع الفاصل الأخير وأحكي أكتر شوي عن يعني متل ما قلنا الأمن الذاتي. ماذا لو صار ما حصل في بيروت أو في الجبل لو حصل في معراب؟ شو كنت بتتوقع سمير بيك؟ هل كنت بتتوقع أنه يعني تدافع القوات اللبنانية عن نفسها؟ أم كان سمير جعجع سيتخذ الموقف نفسه اللي أخذه وليد بيك جنبلاط والشيخ سعد الحريري؟ بعد هذا الفاصل الأخير.
[فاصل إعلاني]
إيلي ناكوزي: نتابع إذاً هذا اللقاء في جزئه الأخير ودائماً مع سمير بيك فرنجية. قلنا أمن ذاتي وهذه أفكار خطرت على كتير من الناس وهي عم تشوف الأحداث. في ناس حتى يعني بديت تبرز عضلاتها وتقول لو دخل الحزب على الأشرفية أو على رمانة.. وهاي سمعتها من كثير من المسيحيين وهذا شيء خطير أنه خليهم يقرّبوا على رمانة أو يقربوا على الأشرفية أو يقربوا على جونييه ونحنا ما رح نعمل متل الشيخ سعد الحريري، لأ نحن ندافع عن نفسنا، هل تعتقد أنه لو حصل نفس السيناريو، ويعني حوصر سمير جعجع في معراب هل تعتقد أنه كان أخذ نفس القرار؟ أم كانت القوات ستقاتل؟
سمير فرنجية: ليك خليني..
إيلي ناكوزي: يمكن السؤال كان لازم نوجهه له ولكن برأيك؟
سمير فرنجية: اللي واجهوا عسكرياً هنّن الأهالي، ما في قرار مواجهة كان بمنطقة عاليه أو بمنطقة الشويفات. الناس اعتبروا أنه فيه يعني ناس آخرين عم بيفوتوا.. عم بيحاولوا يفوتوا على بيوتهم فاعتبروا نفسهم بحالة الدفاع عن النفس. هذا مش قرار. هذا تصرف عفوي صار عند الناس. بالتالي أنه فريق يحاول يفوت على منطقة أخرى رح يتواجه مع عفوية الناس مش بقرار سياسي. يعني بالتأكيد أنه إذا فات حزب الله على منطقة متل عين الرمانة رح يتواجه مش بمواجهة من قبل فريق سياسي آخر موجود هنيك. بيتواجه من الناس. وبرأيي أن سمير جعجع لأ من هالناحية هيك مش آخذ قرار بأن يحل محل الدولة في الدفاع عن ما يسمى بالمناطق المسيحية. لأ. هو رايح باتجاه أنه كيف الجيش ممكن يلعب الدور الموكل فيه بحماية الناس وحماية المواطنين.
إيلي ناكوزي: أنتو راضيين عن أداء الجيش؟
سمير فرنجية: يعني هو بتقديري الجيش ارتكب خطأ بهذا المعنى.
إيلي ناكوزي: من أخذ السلاح من فريق وترك السلاح.. هذا أيضاً غير مفهوم.
سمير فرنجية: يعني في بلحظة يعني خيار صعب كان عند الجيش. القبول بما يحصل يعرّضه لانتقادات، الدخول ممكن يعرّضه ويعرّض وحدته للاهتزاز، اختار أنه يعني يبقى..
إيلي ناكوزي: أهون الشرور يعني.
سمير فرنجية: أهون الشرور. ولكن في عند الناس في مرارة من التصرف. عم عبّر لك عن 14 آذار، بعبّر لك عن مواقف الناس. فيه مرارة مرارة كبيرة من تصرف الجيش، أنه ما قدر حمى وربما يعني مش للتخفيف بس ربما يعني ما كان على علم بحجم مشروع حزب الله، يعني معتبر المسألة مسألة لحظة غضب..
إيلي ناكوزي: ويمكن استيعابها.
سمير فرنجية: يعني ممكن استيعابها كما حصل في 23 كانون الثاني 2007 لما صارت المظاهرات المسلحة يعني هون فيه مرارة عند الناس لا شك يعني بدها أخذ بالاعتبار.
إيلي ناكوزي: في قوى 14 آذار تحفظت. الدكتور سمير جعجع تحفظ على الأقل تحفظ على يعني مشروع أن يكون العماد ميشال سليمان رئيساًَ للجمهورية، والشيخ سعد الحريري قال ما زال مرشحاً. ولكن أنا عم بشعر أنه عند قوى 14 آذار خفّ النبض شوي على العماد سليمان، يعني فيه إصرار بعد من قبلكم؟
سمير فرنجية: هو خليني أقول فيه إصرار على الحل، والحل بيتطلب انتخاب رئيس توافقي.
إيلي ناكوزي: والعماد ميشال سليمان ما زال المرشح الوحيد التوافقي؟
سمير فرنجية: يعني ما فيه اسم آخر مطروح للتوافق.
إيلي ناكوزي: بس ما بتعتقدوا حزب الله والمعارضة يعني بعد اللي صار وإذا بدنا نحكي بالسياسة ستطالب من جديد بالعماد عون رئيساً للجمهورية مثلاً؟ حاطين هالسيناريو بعين الاعتبار؟
سمير فرنجية: بتصور أن أكبر طموح اليوم لحزب الله والمعارضة هو طموحهم الأكبر..
إيلي ناكوزي: أنه يجي العماد سليمان؟
سمير فرنجية: مش أنه يجي. يعني العماد سليمان هو يعني لأنه بجوّ بالتراجع اللي هنّن موجودين فيه ما بقى لديهم أن يفرضوا شروطهم، وبدليل أنه لأول مرة حزب الله بيوقّع على ورقة تتضمن انتخاب العماد سليمان، هاي أول مرة بياخد موقف علني وواضح أن العماد عون لم يعد مرشحاً.
إيلي ناكوزي: لأ بس هو دائماً كان رابطها بقصة التسوية على حكومة الوحدة وعلى قانون الانتخاب وو..
سمير فرنجية: لأ هنيك يمكن يعطل بس أول مرة بيعلن.
إيلي ناكوزي: بدّن يقولوا بعد الحلقة غريب كيف عندكم قدرة يعني تكونوا مهزومين وتحوّلوا الهزيمة لانتصار. الجماعة انتصروا على الأرض ويعني 14 آذار عم تقول أنه انهزم حزب الله وأنه تراجع!!
سمير فرنجية: رح أقول لك شعوري. شعوري يعني أنا بين يعني

من انتصر في الأزمة الأخيرة؟

إيلي ناكوزي: أنت شعورك أنك منتصر سياسياً؟
سمير فرنجية: عم بنتابني يعني أمرين بنفس الوقت. الأول هو العقل بيقول لي أنه منيح وقّفت بهذا الشكل وأنه انتقلنا إلى الدوحة للتفاوض. وفي شي ربما غرائزي بيجعلني أقول أنه يا ريت ما تمت هالـ.. ما تمت هالوساطة العربية، لأن هذه الوساطة العربية عم بتحاول بدون ما يكون هذا هدفها إنقاذ حزب الله، حزب الله انتهى بأزقة بيروت. مش أنه منتصر على حزب الله. أنا عندي شعور أن هذا المجتمع اللبناني أنهى حزب الله. فضّاه من مضمونه. فبالتالي يعني لو بدّي أحكّم يعني الجانب العفوي بشخصيتي يمكن بقلّك يعني يا ريت ما تمت هالوساطة.
إيلي ناكوزي: يعني مش شايف أنه بهذه المفاوضات اللي عم تصير بالدوحة الآن يعني الحزب رح يعلّي سقف المطالب، ومنها مثلاً بعد ما يعتبره الحزب انتصار أن يطالب برئيس يعني يجسّد هذا الانتصار اللي تحقق على الأرض؟
سمير فرنجية: هو رح نطالب بتجريد هذا الحزب من سلاح استعمله ضد المواطنين الآمنين في بيروت وفي لبنان.
إيلي ناكوزي: هذا الخطر يعني.
سمير فرنجية: وهيك رح يصير.
إيلي ناكوزي: هيدي الهواجس اللي كنت عم أقولها أنه مندور مندور ومنرجع للمشروع الأميركي الإسرائيلي لتجريد حزب الله.
سمير فرنجية: لو فيه مشروع أميركي أو إسرائيلي لكان برز دعم أميركي وإسرائيلي لـ 14 آذار. نحن محاصرين ببيوتنا والحزب مرتاح فيه ينقل قواته من الجنوب إلى بيروت.
إيلي ناكوزي: بس هاي نظرية المؤامرة. شو كان الإسرائيليين بيضربوهن على الطريق.
سمير فرنجية: ما بدّي اتهم حدا. بس أنه هو فيه يتجوّل بالمناطق المهيمنة عليها إسرائيل، يعني مهيمنة عليها جوياً وإلى آخره ونحن ما فينا نطلع من بيوتنا، بس يعني هاي للرد على كلام عن المؤامرة. القوات الدولية - بتقول لي عن مؤامرة - ما في عنا قوات دولية بالجنوب، هذه القوات الدولية المطار هو جزء من القرار 1701. شو عملوا القوات الدولية لتحمي أمن وسلامة المطار اللي هو تابع للقرار 1701؟ بالتالي لأ ما جايينا لا دعم أميركي ولا إسرائيلي ولا حتى أوروبي، مش هيك؟ الوحيدين اللي تضامنوا معنا هنّن العرب. المواقف اللي صدرت هي مواقف عربية ما في شي تاني صدر. ونحنا شاكرين لهذا الدعم العربي.
إيلي ناكوزي: جورج بوش حكى مع الرئيس السنيورة وقلّو أي دعم يلزم؟ ومندعم الجيش اللبناني.
سمير فرنجية: حكى معه قبل شهر وقبل بشهرين وقبل ثلاثة شهور وإلى آخره.
إيلي ناكوزي: ساركوزي استنكر يعني كان في استنكار يعني طبعاً.
سمير فرنجية: مش عم بحكي عن استنكارات عم بحكي عن عملية الدعم، كان في دعم سياسي مثلا ً الكلام اللي قاله وزير خارجية السعودية قال كلام بتحسه أنه داعم فعلاً مش أنه رفع عتب، استنكرنا بهالمعنى. لأنه بدّي أقول لك أيضاً أنه لما بيحكوا الأوروبيين بالاتحاد المتوسطي، واجتماعه بشهر تموز، هو اتحاد لدول المتوسط أو اتحاد مع دول المتوسط وإيران. لما حزب الله بيحاول يوضع يده على لبنان مش عم بيحطّ إيران على ضفة المتوسط؟ لما العمل اللي عملوه بغزة ما فتح نافذة على المتوسط؟ بالتالي أمن لبنان هو من أمن كل المنطقة، والمعركة اللي عم نخوضها بلبنان هي نيابة عن الجميع، منطقة لجعل هذا العالم العربي يستعيد دوره. هذا العالم العربي يكون هو صاحب قراره مش أنه الخيار يكون ما بين القرار يا إيراني يا إسرائيلي. لأ العرب موجودين ونحنا بلبنان عم نخوض هذه المعركة ضد الاثنين مع بعضهم. ضد إسرائيل من جهة وضد إيران من جهة أخرى.

هل سيأتي الفرج من الدوحة؟

إيلي ناكوزي: نعم. سؤالي الأخير سمير بيك وهذا اللي هلأ ناطرينه الناس. الناس فعلاً فيه تفاؤل أنه خلص يعني من بعد ما انفجرت واللي كان يعني متوقعينه الناس على مدى سنتين أنه بركي وغيره.. صار كله. أسوأ من هيك ما بعرف شو ممكن يصير. شو بيصير بقطر؟ يعني هيدا التفاؤل كمان عند الناس أنه مبرر أو يعني هي كمان إبرة جديدة من المورفين؟
سمير فرنجية: ليك بالحد الأدنى يعني هي وقف إطلاق نار طويل الأمد.
إيلي ناكوزي: بس شايف انتخاب رئيس وحكومة وحدة وطنية..
سمير فرنجية: عم بقول لك بالحد الأدنى. مسألة انتخاب الرئيس وتشكيل حكومة وإلى آخره مرتبطة بقرار سوري مش بقرار حزب الله. بقرار سوري. هنّن معقدينها من الأساس. هل اليوم هنّن مستعدين يغيّروا موقفهم؟ ما بعرف هيدي بدها تبيّن بالـ 24 سنة الجاية. بس المسألة مش مسألة أن نتوافق نحن كلبنانيين. الاتفاق على العماد سليمان تامم من فترة طويلة. كل يوم في شرط إضافي لتعطيل هذا الانتخاب. فبالتالي لأ السؤال الكبير اليوم وبدّو تكشفه مباحثات الدوحة هو: وين سوريا اليوم من أزمة لبنان؟ هل فكت يعني هل حررت جماعتها بلبنان وتركت لهم المجال يطووا هالصفحة؟
إيلي ناكوزي: شو رأيك؟
سمير فرنجية: مانّي قادر أقدّر. بس على كل حال إمكانية أن حزب الله يرجع يستخدم سلاحه اليوم أصبحت أضعف بكثير مما كانت بالماضي. يعني اليوم ما بقى حدا مغشوش أنه هذا سلاح مقاومة وعم بيدافع عن القضية وإلى آخره من الأمور. انتهت هيدي المسألة.
إيلي ناكوزي: للأسف يعني انتهى الوقت ولكن كان في كتير بعد من الأسئلة ممكن أن الواحد يطرحها على أمل أن نلتقي من جديد ونشوف نتابع شو رح يصير بالدوحة وعلى أمل يعني ألا يتكرر ما حدث ومتل ما قلت أن هذا السلاح لا يستخدم في الداخل ولا أي طريقة بشكرك سمير بيك فرنجية على هذا اللقاء الغني اليوم، وأشكر أيضاً المشاهدين على متابعتهم. أشكر معدّ ومنتج البرنامج حسين قطايا ومحمد البنا المسؤول عن الفريق التقني. نلتقي في الأسبوع المقبل إن شاء الله بنفس الموعد. شكراً لإلك.